成功爭取取消銷售稅！

我知果D死人政黨一定會咁寫，一定會掛到一街都係膠banner，驚死我唔知我自已取消左gst咁！

我知我知，你地都好鬼開心丫麻。
我知我知，你地都話，一早就話比我聽唔得丫麻。

你估我唔知咩。你賴我都無用架，你到左今日，都仲攪唔清楚，到底點解我要推gst? 後知後覺D喎，成壇野，其實係煲煲自己攪大左個頭，科網爆果陣，整左個咩稅基狹窄諮詢委員會...，咁果時講到好有問題，香港隨時會破產咁，佢又驚，如果選果陣比人問，唔知點答，又唔想下屆攪D咁野，咪迫我一定要做囉，攪到我咁"law"，等我無得做CS丫麻，賤精！你睇下佢今日丫，仲出黎講話「務實」，咁即係咩意思先，即係話我個人好高騖遠、唔踏實、好做唔做咁話啦，係度扮晒英國人綿裡針.............!!

我知我知，你地實話我自打咀吧啦！
我知我知，早幾日，我先係垃圾會鬧完D政黨不負責任。

但你又知唔知，份稿邊個寫架? 唔係我個PA.....係煲煲個SPIN DOCTOR，佢迫我讀佢篇稿....!!!唉，真係，啞子吃黃蓮呀！

你估我想架！我真係唔想架，開左GST，到時邊個買我果D靈芝喎！

唉，我今朝出門口，已經搽左好多面懵膏，都唔係好菸o者......我諗，D市民都會明，我係比亞煲煲迫架O者......我已經講左好多連自己都唔信既原因，去解釋點解要開GST架啦喎......係咪，都好obvious呀? 會唔會令班商家(即係小圈子果班)以為我智商有問題丫? 應該唔會卦！

其實係亞娘教我架，佢話，政治既signal，越唔想推，就要推得越勁，攪到D人都諗唔明點解我要咁，就會識掉轉黎諗喎.....我自問，都做得好出色架啦................咁....果班嘈喧巴閉既政黨......咪即係......

不過，講你知丫，我真係好頂唔順班假髮黨。

如果你有睇晒今日D新聞，你都知，果D豉油黨、白鴿黨同林善聯，已經碌出黎領功啦......咁我都唔怪佢地，咁佢地真係反得好犀利....好過煲煲，出黎領功，係領人地果D功.....BTW，我想講既，湯湯居然話失望，佢話我無決心擴闊稅基......我真係....覺得，沙灘上面個太陽囉！

拿，即係咁，你反對唔緊要，我咪同你玩囉！

但係，假髮黨又唔夠膽支持GST，當花旗森係垃圾會動議反GST果陣，佢地支持個MOTION，但係，而家又出黎媽我，又話律師要好有邏輯既? 係邊呀? 佢地黎同我講BUDGET果陣丫，明明話支持GST同反對減薪俸稅嫁，早幾日，湯湯又跳出黎，鬧我低估盈餘丫！喂，點玩呀? 再係咁，我唔同佢玩..................!

唉，你地唔明架啦，見我果D人，見人講人話，見鬼講鬼話，野野都跣我......條腰真係唔襟撻......！唉......

WELL,我要休息一排呀，要開始寫BUDGET啦！出年一月，再同你地嗲過啦，(下次梗係嗲BUDGET啦)！多謝所有留過COMMENT，同埋係個BLOG，或者係唔同FORUM留過言、推介過個BLOG既朋友，尤其有位叫city2047或類似名稱的朋友，我知你在很多FORUM留過言叫人睇，多謝！

豬兜度度有，政府特別多

我都唔明下面班人做緊乜！

我星期一先上電台，豬炳都聽得出我唔會減稅啦，好心肥馬管下班馬仔啦！尋日出個press，話應該可以做到56億surplus，大佬呀，駛唔駛咁早碌出來同d政黨做勢呀? 等果d反對黨──即係反對我做既野果d......跳晒出黎叫我減稅，唉，我想截都截唔住！

我撥個輪去肥馬度，呢隻野居然仲敢駁我咀！

糖：你個腦生係屎忽度呀......
肥：(細細聲)大家咁話啦！
糖：.....我岩岩先媽完果班人，叫我減稅要「回復02/03年係貪方便」，你今日set好支q比佢地上，你同佢地有路呀....
肥：你咁講，即係話埋我風塵三俠黨個老死o者，佢果時咪又係咁...同埋，凡事都有兩面既，拿，我地咁樣一早講定，班白鴿仔咪無得話你做數囉......咁都幾好呀，佢地咪最多話你係守財奴......
糖：你搏炒呀，再嘈，公廁都有得你守呀！
肥：咁我以為上年我衰左，今年唔想比蕉皮你踩o者，咁又唔岩......
糖：你......

咔.........

死肥馬，都唔知，係咪為左下年仲有得做，過左去煲煲個馬房......我明明成個plan，就係要講到好無可能咁，然後到最後先宣佈架麻，而家攪到我做咩都係因為d討厭既政黨出聲話要，我先回應，攪到我好似亞董咁慢三拍......到時又比佢地班人第183次成功爭取......都唔係路，要諗下計先得！

煲煲之英明神武

你尋日有無睇西報呀? 我睇完，真係笑到死咁濟.....星期一煲煲去簽個咩咩約章，同班鬼同空氣污染，西報果張相，係佢對住兩個鬼佬 講野，講到好鬼興奮咁......兩個鬼，個木廿土水 樣扮到好appreciate咁..........講多無謂，去片啦！

拿，你睇下上面果張，我地亞煲煲幾咁英明神武！當然啦，呢張，係官方相丫麻，唔影好D，點用黎選舉喎！

不過，睇下下面果張，就係西報相，係咪好似殖民地時代，港督去巡學校，由學生會會長戰戰兢兢介紹學校俾港督睇呢！



所以呢，人生得矮，就真係差咁d......！據說尋日呀，佢睇到呢張相，話以後唔比料西報呀，小器得佢丫！

唉，我真係要多謝亞娘，生得我手長腳長身又長，企出黎都精神d啦！返去真要鍚番亞娘一啖！

不過，醫生都係好高大威猛喎.......無著數添！

無左半條人命

唉，終於上番水面啦......可以唞啖氣啦....！唉，你知啦，搏札....就係辛苦d架啦，我都明架啦......。

呢排，我實情做左一棵聖誕樹.....你知啦，聖誕樹，無手，點寫blog先得格.....

而家浮返上水面，咪可以去電台講下野囉！

唉，其實我呢輪，係見緊班政黨、商會、漁農界代表......同埋亞爺，問佢地想我派咩聖誕禮物....你知啦，佢地個個都以為自已好另好重要，實情係連政府收幾多稅都無知，叫我做果d野呀，如果我真係做呀，莫講話收gst丫，用埋亞爺果筆棺材本都無夠！拿拿拿，我根住就會見班經濟學者，佢都多數都唔讚成政府用咁多錢，咁就好啦，我就大把藉口推佢地掛上黎果d禮物啦！

咪住，唔好咁快就話我唔聽意見先得格！你都唔知佢地叫我做d咩。減稅就梗係有啦，仲有叫我比二百億d窮人呀......!使去邊先? 最好都係假髮黨，你知唔知呀，佢地話唔好減稅、仲話唔會反對開gst添呀，真係合晒我何車......不過我串亞湯湯，「咁你地又支持花旗森個motion? 貓哭老鼠....拿，睇個樣，我就收唔成gst架啦，你地果d咩要求，well，你可以返去等電話啦，如果一星期收唔到電話，你可以當你地已經落選......」佢地呀，即刻連面色都變埋呀，「糖糖，你知啦，我地後年就要選，三個黨都反對，你個方案又咁難sale，真係有d困難喎,,,,」湯湯，真係好似死魚咁呀......都唔知幾好玩......邊個叫佢地咁無義氣呀！

仲有，肥馬報告呀，雞議會突襲成功呀！我叫亞眼科醫生，交個名單黎，叫d針提個温和既動議，話稅基窄，果班白鴿黨既雞議員，即刻亂晒陣腳，投票投到亂晒籠......哈哈，你班人，以你地既力量同我鬥?簡直係蚊脾同牛脾！

gst呀gst，我真係好愛你呀......你帶給我歡樂......帶給我興奮，仲帶給我榮耀添呀，真係一次過滿足晒三個願望呀！

btw, 新加坡李資政玩野，居然加銷售稅，加到7%！唔通煲煲暗地同佢果邊結盟，想攪到我收唔到gst? well......

象牙塔即係象牙塔！

呢個咁既樹熊系主任......識少少，扮代表！話我無改革稅制.........我就黎反駁佢，以正視聽，重有，為左下一代著想......以後，邊個再敢批評我.....我就炒左佢！

第一，政府既財政嚴重不穩。個問題唔係過去會駛幾多，係以後會駛幾多......我唔想話我自己岩，但係都唔想話你錯......但係我唔講得咁多比你知。你佑啦，西九唔拍賣，東九都唔會，咁無地賣，錢從何來先得格......我重要起埋成條港豬澳大橋，成五百幾六百億！重有煲煲一年到黑做呢樣做果樣，今年淨係份 C 政報告，已經駛左成百億...！本來，我真係以後跟住幾年會有錢剩，但咁睇法，我真係好悲觀！呢d，你有無計過? 仲有，煲煲選到之後，仲要報答果八百個選民呢，一人一億，都八百億啦！我一年收得二千億架咋！

第二，人口老化就一定架啦！我都就黎退休啦！增加薪俸稅即係加稅！加稅好難過到垃圾會！我收gst，係想擴闊稅基，唔係想加稅..................不過唔多覺意收多左稅，梗係唔會比番你地啦！............間舖頭找多左錢比你，你都唔會比番佢啦係咪先！

第三，imf話香港稅基窄就係稅基窄，你咁叻，又唔見你去imf做，然後話香港稅基好寬，等我唔駛做丫咪！你都唔明，香港稅基有幾窄，人地，d人用膠袋要比稅，請人要比稅，炒人要比稅，買野當然要比稅，儲錢都要比稅、行路要比稅，呼吸都要比稅......我而家，淨係買野先比稅，有咩問題喎！再嘈，我要示威都要交稅，等你地咁鍾意示威丫?！

第四，銷售稅梗係公平啦！窮人要自己比，有錢人開公司，就可以係公司比，因為佢地買車、買名牌，全部都係公司比錢！我既原則，係無論有無眼耳口鼻，只要有心跳都要比稅，費事等陣，d人話我淨係減紅酒稅，為左自己！

第五，無論成本幾高我都要收！我夠知收稅，就要搵人去check下d舖頭有無淨係收現金、有無叫人去中英街提貨、有無叫朋友由深圳將間屋化整為零帶番黎，同埋有無d退左休既法官，去話自己收入低，然後拿津貼，同埋，果d麥記、x心、大家落，走黎要求佢地少稅d，因為佢地話，佢地要煲水果d煤氣要比稅，但係比水人飲唔收錢！(我一定唔會退比佢！d煤氣用黎煮野，唔係煲水，佢要打官司，我一定奉陪到底！駛錢，有咩緊要，我錢多的是，都係政府比之麻！加重政府成本? 你比o者，又唔係我！)

第六，香港稅制失去競爭力，唔係因為高過其他地方，失去競爭力既原因，係因為收得唔夠多錢比我駛！你真係，要人畫公仔畫出腸！你係咪做人做左幾十年架！

第七、我唔係無研究過，我研究過晒啦，淨係得gst行得通，你唔信，你咁另，咁你提d辦法黎聽下啦！

象牙塔即係象牙塔！

唉，我仲係咪做好呢?

睇黎我都係唔得架啦！

呢幾日，我靜靜地咩都無做，當自己係一個普通人咁，重新睇番，究竟我要點做，先可以攪到gst。我真係唔係幾信做唔到......又話香港人好專業，我用果d，全部都係專業資料黎固喎，點解咁多人鬧我呢?

......其實，我未有結論，不過，我隱隱覺得....自己好無用，收個稅都收唔到......仲要，四十票反對......我覺得，越黎越唔適合做政治，可能適合做爹地多d.....

點解咁講，你諗下，我點夠佢個班垃圾會議員咁好戲先得架！本來我都唔知，我一路都覺得，佢地只係驚支持收稅會失票，但係越睇越唔妥......果日，工會女同志好戲到......扮喊......我點識先得格......

講真，今次呢單最低工資，擺明就係煲煲同工會扯貓尾啦，工會攪到懶係大單，又通宵，又話告，又話唔支持；跟住，煲煲同勞工處打個招呼，咩都攪掂！煲煲咁高招，攪掂工會，仲要埋女同志第一次...流馬尿，到達煲煲重比左幾多好處比佢地呢? 唔通，出年煲煲選到之後，會放水比佢地，等佢地後年垃圾會重選會有著數?

唉，我係咪諗得太多呢? 因為，我諗唔到煲煲咁樣有咩著數，佢實會比工會夾住固喎......合唔合邏輯呢? 定係其實係我自己鑽牛角尖呢?

唉，我都唔明，我都做左咁多年生意，點解都唔夠煲煲呢個咁既公務員黎呢? 咁，出年係咪都係唔好做呢?

一身鬆晒，以後都唔駛做

好野，一了百了。好呀，以後咩都唔駛好咯！你知啦，我淨係管盤數之麻，咁而家垃圾會班垃圾....議員反對開 gst丫麻， 我都無錢用，仲有咩好做o者，果d每年的預算accounting，咪叫肥馬做左佢囉！

雖然，跟住落去其實我仲有d論壇，不過我真係唔駛比面......星期二日月報攪果個，我就一定係話無錢無得減稅！我叫肥馬星期一去假髮黨果個論壇，一定要串湯湯，都反對左咯，你地都已經有立場咯，仲攪埋d咩論壇做咩o者，學煲煲咁貓哭老鼠！

我下個月就開始見d人講budget，到時見所有人，除非佢地唔要求政府駛錢，否則，我一定叫佢地比左條橋我開新稅，如果唔係，錢從何來呀?

果班咁既低水平垃圾，係度講埋d亞媽係女人既野，我都知唔收稅最好，但錢從何來?

收入中立? 講下唔比咩，如果真係收入中立，我做咩要做咁多野喎。

不過，果日我叫肥馬係垃圾會聽足全場，佢話好彩放左兩粒air wave係對眼度，如果唔係，咁悶，一早就釣魚喎。

不過唔緊要，正如baby話齋，我仲有一個好強大既後盾，就係imf啦！佢地好支持我開稅！勾結外國勢力? 係又點丫? 最緊要做得到o者........約左誠哥打波.......梗係啦，收錢又唔得，駛錢又唔得，唔打波有咩好做喎?

沒有gst之後......

呢 D 傳媒都係衰架啦，仲唔係傳媒政客大合奏！D咁既報紙，仲唔係夾埋果幾個政黨，同今日個動議做勢? 你講話無，我都唔信呀。

果幾份呀，係啦，係果幾份啦！

唉，今日成日，咪就係為左聽日份SPEECH改黎改去囉。其實，我都唔明點解唔比我講真心話，如果可以................

* * *

各位議員：

老實同你地講，其實今日你地講果d野，我全部都同意，除左Baby同支持gst果班講果d之外，因為，我都唔想收gst......。講你都唔信，我一路做咁多野，都係為左今日，等我有機會同你地真情剖白。

我唔想收gst，唔係我唔鍾意錢，係收得太麻煩，同埋唔夠累退，所以，反正你地都唔同意開gst，我決定收回！

不過，你唔好拍手掌住呀！高達，你反應咪咁快好唔好，唔使咁快諗住打電話叫職員做banner領功！

大家既然覺得收gst咁煩，我打算改為收人頭稅！人頭稅既好處好多：第一，簡單，有頭就要比稅，如果有兩個頭既，比雙份，無得豁免！第二，簡單，每年自動過戶，稅單都唔係比！第三，簡單，我要加稅，只要同十間八間銀行講聲就攪掂。第四，簡單，我計盤數好容易，唔會有好大誤差。第五，簡單，唔會有人逃到稅，簡單黎講，呢種稅既發明者真係三頭六臂五簡單！

至於gst的好處，你地可以繼續討論，我要返去寫定下年盤數，預測下有幾個人死......即係我出年有幾多錢使................丫，係，收幾錢? 每人每年$29,000，咁我可以取消晒所有其他稅！

即係咁，如果你果d咩白鴿黨，咩林善聯而家回心轉意既話，都重要睇下大爺有無心情同你傾！你諗掂，就打黎M字搵我啦！

* * *
等佢班友仔，反對我個寶貝gst丫啦！

咩叫教育? 咩叫交通? 咩叫醫療?

拿，果班咁既垃圾會議員，唔好再話咩咩咩無得豁免呀，我比左架啦，咁又無?十四億啦......點計出黎? 我話十四億，咪就係十四億喎，你聽我講咪就得囉。

其實一日最衰都係果個死肥馬，我雖然批准你去媽果班垃圾o者，但係無叫你媽到佢起晒火丫麻，攪到我，要將原本出年財政預算先拿出來的條件咁早講，要再諗下下次有咩派，佢真係.......偷雞唔到......。

你仲未知我講咩呀? 我諗住豁免教育、醫療同交通費抽稅呀....都叫你睇報紙咯......

唉，你都唔知，做呢個位，真係辛苦到死呀。煲煲個位就好做好多囉.....唔想做果d又可以比人做！你都唔知呀，我今日，對住果班咁既報紙編輯，個個....(其實唔係個個既，得三份係黎真架o者，兩份中文，一份英文......其他果d....佢夠膽，咪試下囉，唔比獨家佢囉......)係度左問右問......，猛咁問十四億點計出黎喎............我點話你知先得格，因為肥馬同我講，顧問公司個顧問話，就咁計就十四億，但係你知啦，咩叫教育先...咩叫醫療先.....咩叫交通先。

拿，好簡單，第日所有買鞋都要豁免埋，11號巴士...都係公共交通工具......
咁買襪又要豁免啦，唔著襪，點著鞋呢?
電話費都要豁免，無人話transportation of voice唔係transportation既一部份......

ok，咁買牙刷、牙膏、牙線............都係基層醫療服務一部份，d市民會話.....
買頭痛藥、靈芝、燕窩(亞娘一定要....)、人參......有保健作用，又係醫療一部份......
仲有，到時，全人類唔去私家醫院睇醫生，去晒公家度睇.......個餅又大左....

至於教育喎.........約人去食飯，係因為要學野囉......佢教學打golf.....
打電話上網問功課，咁點可以唔豁免架.....
返學要著衫先返到......，唔係返唔到，所以，衣服、教科書、文具、書包，仲有亞媽果d衫呀，手袋呀、介指呀，全部要免稅，因為亞媽帶小朋友返學，要帶手袋同珠寶出街。

果d咩i卜，都要免稅，因為小朋友要上網download果d podcast，如果唔係讀唔到書.....！

呢，上面果d，全部都會逐步逐步慢慢扣.......我話收少十四億，係第一年咋。到第五年，如果仲係收5%，應該剩下30億！

咁無得收?咁咪加多d囉，40%！實現香港成為全球稅率最高的地方...........！我諗過既，你仲駛諗咩.........

都唔過咁點? 都話收工咯，點做o者！

大勢已去......但係我咁聰明，又諗到新橋啦~~~~~~~

唉，雖然煲煲搵露三點修訂星期三花旗森個gst motion，但係睇黎大勢已去，垃圾會都話反對，就真係做黎都徙氣......我唔係怕左佢地班人嘈喧巴閉，個問題係，如果我要收稅，唔係話我係財政預算度講兩句就可以架麻，要寫條法例，果班垃圾會議員通過先得架..................都唔明點解d英國豬咁蠢，有咩理由定d咁既制度，縛手縛腳，簡真係同自己作對......。

而家只係睇下點收科，幾時同點樣宣佈收工.....我太無毅力? 我又唔係洗毅力，點會有毅力喎！如果你咁諗，你真係唔理性啦，我有得做先得格！

你教我點做丫，我比我個位你做啦......咁煲煲做亞頭都咁縮骨，係份 C 政報告一隻字都無！個個官都彈開九呎遠，好似我生天花咁，我都真係同情掃把頭當年都真係慘。我最初，其實以為有得諗，你知啦，林善聯咁憎煲煲，佢地其實想幫我同煲煲跑過，但係摸到亞爺個底，知道亞爺想穩定d唔想變得咁多，就已經唔使諗，最慘就係果排白鴿仔猛咁示威簽名，攪到佢地下面d o靚嘈喧巴閉...，單眼曾話，果d屋村師奶好鬼反對，班衰議員出年要選舉，比白鴿仔做晒佢地會好大鑊咁話喎......就係咁，連最同情我既林善聯都拉埋橫額！

本來，假髮案亞湯湯見我個名同佢咁似，都好支持。你知啦，佢好鍾意政府收稅嫁麻，以為收到稅我就會攪社會福利.........但係，其他幾個假髮人襟住佢，唔想個黨分裂，因為社福長毛實反?，同埋，另外果幾個假髮人，根本就好唔妥佢咁鍾意出位，成日d野都未傾過，或者未傾掂，就賣賬比記者搏出位，攪到無晒黨紀............佢而家都唔敢出聲，同埋，你知啦，佢地幾時有支持過政府先得格? 所以，都係唔使諗......因為，我已經係報紙度見到佢地話會支持花旗森啦！

鼓油黨本來有d機，話晒都係老友，如果係佢地入到，我真係可以同佢地傾下，改得好d，唔好無彎轉，但佢地又唔爭氣......！

唔通叫白鴿仔反對自己個motion咩? 唔好玩啦，你當我白痴架?

我都話左無計啦......................一係，組織班公務員去現場支持我又得唔得呢? 既然甜甜佢地可以叫d鋪頭d staff去遊行當返工，我點解唔可以喎?

除非......，叫董董出黎....??唔得唔得，我都無好日子過....

又或者......邊個立法會議員支持，就可以分配到1000張出年車仔黎香港既飛.........不過，佢地唔係衰議員，1000張飛，比衰議員就夠佢買票，垃圾會議員個區咁大，唔夠派喎....

唔通，丫咁實得！支持果個垃圾會議員，佢果區市民免交薪俸稅五年！咁佢d選民，咪會迫佢支持gst囉！丫，係喎，咁咪淨係得港島果d支持囉? 九龍同新界d人咁窮，都唔使交稅.....

又或者....支持我既可以見亞爺，提一個願望....................但係，如果班白鴿仔叫亞爺普選咁點算? 如果叫香港，可能都仲好d，等陣，爆缸仁仁話要大陸有民主，或者平反六四，我咪死梗......！都係唔得......

CEPA? 佢地都唔做生意......

見美國總統? 布殊無咩吸引力喎......克仔好d喎，但佢又唔係總統...！

綑綁！係啦，係綑綁啦！唔支持gst，就唔比錢做教育同環保......，得喎，又可以做低煲煲，又可以做低白鴿仔同鼓油黨......等我做低出年盤數，攪到有赤字先......到時，我就同佢地講數，拿......你見啦，無錢呀，無得做啦.............，仲可以做低埋煲煲，等佢用我d錢黎選舉用得咁爽丫拿。你見啦，佢地一早已經碌左出去領功，果d咩成功爭取橫額，已經掛到一街都係......好，聽日撥個輪比肥馬，叫佢好似今年咁，做低盤數先！

唉，學泰國啦，叫亞爺授權比我，拉晒佢地去秦城！咁就乜都攪掂晒，唔駛咁煩！

居然係白鴿仔幫我出左啖氣！

我雖然唔鍾意白鴿黨，因為佢地今年成年好似上左身咁，猛咁鬧我造數......咁我盤數梗係要做啦，唔通可以變出黎咩.......其實我只不過計錯左數，計少左一百億之麻，使乜咁緊張喎，但係佢地偕偕就不停咁話我造數...........其實呢劑又係肥馬害我....都唔知以前點做銀行，成日都計錯數！

不過呢，今日我幾乎想攬住佢地錫咁濟！

今日，白鴿黨橡筋褲第一個問問題！咁正常人都會覺得，佢一定係問最低工資，果然......不過，佢居然係GST喎！

佢串亞煲煲，份 C 政報告 個所謂主題.....以民為本咁話.....但係七成人反對銷售稅，叫佢收番咁話喎！

嘩，我直情成個人醒晒......第一，我要打醒十二分精神，睇下佢有無再比蕉皮我踩。第二，我要睇下佢識唔識答......！

我睇住佢，第一句講出口既，居然係「其實鄭議員是有兩個問題，一個講銷售稅，一個講為何不落實最低工資政策。」然後，佢話「銷售稅不是一個新議題，提出銷售稅的原因，我已在很多場合解釋過，這個問題我們已研究了差不多六年......」

好明顯，佢根本完全無預備要講GST，所以，佢完全忘記左GST果D野，要遊完一輪花園，先至開始講番咩稅基窄................

跟住，佢講講講，講左一輪最低工資......跟住橡筋褲居然仲追問GST...

佢個SPIN DOCTOR明顯叫佢唔好再講GST，所以，佢無講過咩野，但係，如果我係市民，我點會唔覺得，佢左閃右避.....好似今日份西報咁，佢駛錢，我就揹左個GST...

雖然做唔低佢，但係，WHATEVER，總之呢劑係UNEXPECTED既，就點都令我開心左一個下晝，突然間覺得，白鴿黨有時都STUBBORN得有D可愛。

你話煲煲幾絕丫！

成份 C 政報告，一隻gst都唔，莫講話撐丫，直頭同亞董「唔講就不存在」有得揮呀。仲有，連扶貧都唔講。總之係我做既野佢就唔講！

你話佢幾咁絕丫。唉，有時我都諗下，真係你選飽佢啦！雖然，做到一區之君，點都係光宗耀祖，但係，為咩先得格? 煲煲而家直情全情投入選緊舉！個網站攪到懶係專業咁，咁都算啦，但係，喂，使唔使咁小器呀? 攪到我好似無做野咁，唔通你唔提我，我就不存在咩！咁掉番轉，我讀筆直果陣，係咪又唔提佢做果d野，當佢不存在先? 唉，真係幼稚到......我終於知道咩叫返老還童，佢都六十幾啦，就黎拿到生果金囉，仲咁小朋友......我d仔女，讀小學已經唔會話「我唔同你玩」呢d咁野啦！

你地而家清楚啦，亞高達係報紙度話佢，無錯架(雖然我好少認同佢講野)，佢根本就係快閃黨，不過，仲係快閃黨同攝石黨混合體！好野就係攝石黨，唔好就快閃......

所以，都係唔駛旨意佢啦！玩完今個禮拜，下個星期就輪到我！講真，去我就唔想佢架啦，不過，煲煲叫左個行歪議員修訂花旗森個議案，咁無理由我自己唔蒲頭架！同埋，我又真係好驚肥馬講錯野，你見佢肥到咁，就知啦，佢個人諗野唔識轉彎，生吞活剝，呢幾日報紙話中年發福果d，記憶力都差d架！呢幾日，仲要捉林善聯班友係捽下先，大佬，無佢地支持，等陣真係比佢地過到就好煩，班白鴿仲唔嘈到拆天咩......都係煩嫁啦，好衰唔衰比佢地抽到！叫亞湯湯幫手遊說下果幾件假髮人先，佢地無個識經濟，好容易講，又鬧煲煲唔要積極筆杆魚、又話要政府做福利、但又話支持銷售稅；話要幫中產、又唔比減稅，都唔知想點，所以，反而好易講......好，睇日約佢食早餐先！

C 政報告GST部份優先睇

唔，聽日份 C 政報告，大家都已經係報紙度睇到啦！不過GST既段落唔長，因為煲煲始終想將條蕉皮留番比我.......不過，如果真係寫，係該點寫呢? 唔，拿，政府就梗係用D好似幾有道理既語言同你講啦，但其實，講白D既話，就會係咁：

---------------------------------------
呢排成日都有人，問我點解要開GST，其實，成壇野都唔關我事，係糖糖話要開......至於報紙話我比蕉皮佢踩，我只可以話係佢既苦肉計成功。點解佢要開? 我唔可以代表佢立場，但係，簡單黎講，做盤數容易D囉！

當然，話就話唔關我事，但我都有著數架！而家就話比你知。第一，我可以攪掂果班明星仔！佢地一無工開就好麻煩，成日叫D大佬黎煩我。

第二，等我可以派多幾個餅仔。呢樣我要詳細解釋一下。你知啦，我有八百個選民架麻......我話晒都係亞爺D o靚選我架麻，我點都唔可以唔派番D獎比佢地呢。但係，我又唔可以個個都派大紙經.....咁呢，我就必須要整多D餅仔。

咁我又唔係耶穌，唔識得五餅二魚丫麻......於是，我咪要整多幾個諮詢委員會囉.........拿，我地而家有狗隻及貓隻分類委員會，咁我要加多幾個雞隻及鴨隻分類委員會、豬隻及牛隻分類委員會、貝貝及蜥蝪分類委員會.....，以示公平。我地而家有氣體安全諮詢委員會，我要加埋固體安全委員會、液體安全委員會。而家我地有香港會計師公會調查小組A，加埋B, C, D.......Z。有海魚獎學基金顧問委員會，係咪要有埋海蝦、蟹獎學基金顧問委員會、海馬、海象、海狗、海獅、海草、海螺、海鹽、海水.......獎學金委員會......。

既然有橋樑及有關建築物外觀諮詢委員會，使唔使有埋行政長官外觀諮詢委員會。有高速船諮詢委員會，使唔使有低速船諮詢委員會......！

你知啦，叫佢地開會要打電話，要打咁多電話，請好多人先得架......要請人喎......D錢係邊度黎喎，樹生出黎咩，GST囉！！！

第三，當然，有左GST之後，「擴闊稅基」！於是政府咪唔駛靠賣地囉！唔駛靠賣地，我咪可以整多幾個西九龍、數碼港......囉！咁樣，誠哥一定會讚我乖仔o者！仲有，我唔做之後，仲可以有個幾百薪年薪既乾收銀(即係consultant呀)位添呀！
---------------------------------------------------

呢D.......係我截聽返黎架，估唔到呢！

諾貝爾先生

星期三，煲煲就會讀佢果份 C 政報告，我地就星期二開行歪會議既時候會有得睇！不過，我估戲玉唔係呢份咁既物體，因為牛頭角順嫂都知唔會有大動作。老老實實，由而家到出年三月，話短唔短，話長唔長，無事發生又得，大單野都得。煲煲都唔敢咁寸，攪到自己好似已經連任左咁...

我估星期二應該會傾下諾貝爾先生果單野......你知啦，呢個世界，唔做野唔緊要，最緊要唔好做錯野......而家煲煲講一句，就攪到上左國際新聞，比亞諾貝爾先生係份全世界都睇既報紙度唱佢，死唔死?

雖然話行歪會多數係佢d人，但係唔好唔記得仲有d舊人係度.......佢地實會用呢個機會炸煲煲，要佢補鑊，例如叫佢出去唱好啦，或者要佢約d領事傾下計啦咁.......見到佢咁，我點都有d心涼......

冷血?你真係有所不知啦！成單gst，攪到我比幾多自由經濟果邊果d人媽到我反艇呀....例如係美國出晒名既townhall...雖然我都係一個好保守既人，但係收gst就真係唔係我既諗法！因為，對所有人都無好處。不過，坐呢個位，頂硬上咁解！

而家，佢自己拿石頭?自己隻腳，我唔心涼就怪啦！

----------------------------------------------------

btw, 你地唔使期望煲煲會係佢份野度放鬆口氣唔推gst，因為唔推gst，佢根本無辦法收到錢去推佢果d大計，贊助明星仔呀，whatever......

呢排好彩個世界有咁多野發生緊，好多人已經唔睇gst呢壇野，所以都真係輕鬆左d, thank god!

煲煲要推 gst既終極目的

聰明既你，應該已經估到點解煲煲谷我推gst谷到咁行哩..........你仲唔知呀? 我一早都話，睇呢個blog，係要睇報紙先睇得明架咯......煲煲想去荷里活丫麻...佢嫌淨係有機會上中東海，太老土，攪到佢個爵士cheap晒.......拿，講明先呀，你知啦，呢d野，佢開會果陣呻，出黎實唔認，咪話我講大話丫...

即係呢，果班無工開既電影人，無野做，就諗好多「政策」出黎，成日遊說政府......以前都成日遊說我架，不過我唔鬼睬佢地之麻，車，佢地d戲都唔好睇，點解要支持喎? 如果好睇，好似周星星咁，去到賓賓國都咁紅，使鬼資助咩係咪? 但係，你知亞煲煲啦，未做過生意，唔識做生意，人地講佢就信囉......

錢從何來? 唔係樹生出黎，係你果度黎呀！唔收gst，邊度搵錢資助呀? 咁呢，於是以後所有有政府資助既電影，個製作人就係煲煲啦。

有咩好處?

1. D半紅不黑既藝人明星仔可以加人工，會支持煲煲
2. 萬一唔覺意，有一部戲去到荷李活，咁佢就可以去主持首映啦，萬一得埋獎，佢就會好似你安咁，全世界都睇到佢係製片喎！

不過，唉，第一，香港d橋咁水，我有生之年，都肯定唔會見到佢上番去啦！第二，政府咁政治正確，好笑好睇既，一定唔會申請到資助！你睇政府d廣告片，同埋果套唱國歌就知啦！第三，如果我係拍電影果個，好橋一定留番比自己，費事同政府分紅丫麻！爛片就申請資助，個理由一定係「小眾藝術都要發展既」！

雖然，我(下面D公務員)好努力咁推緊GST，但係，我都一定要用一句好簡單既說話, SUMMARIZE GST既目的話你知：資助明星仔去賓賓國結婚！

仲話唔係自私...

今日無野做......真係好無野做......開完行歪會議就得閒到死咁濟...！返到office無聊上網，心血來潮睇下自己個網頁...即係政府幫我做果個呢...平時我多數睇開budget果個，因為我成日都唔記得自已係果個咁既budget講過咩，成日都要返上去睇下....

不過，我做左咁耐，都係第一次上去自己個網站睇，嘩，嚇到我，暈咁濟......我以前做果個咁既爛鬼泡沫局見網頁都見得多，果種老土法.....唉，我都無眼睇.......同我咁高貴既style真係一d都唔襯......本來，唔靚都唔緊要啦，但係上到去又亂碼...又唔知飛左去邊，唔識既人，以為呢個係初中生做架添，我個仔做d網頁，都好過佢好多......我真係越睇越唔順超，於是走上去煲煲個site，嘩，攪錯呀，靚咁多......淨係掛住為自己選....我唔理，我下年一定打條數落去換個個網頁.......仲要加5%........因為我相信，我一定可以成功推到......

盈利預警

果日叫樹葉去迪迪仔樂園出下巡，其實有三個目的，一來，梗係等佢可以帶一大班公關呀、保安呀、記者呀，入去迪迪仔，等個場面唔好真係冷清得咁緊要，費事比班垃圾佬垃圾婆話我浪費公帑。你知啦，亞董咁豬炳，果時人地出豉油佢出雞......據聞，特府叫人地公司present果陣，人地話咁快就做好，點解? 想黎香港呢個當然，上海果個重要等下，點都要飲左頭啖湯先啦......原來，其實係之前已經有個集園諗過係度起，不過計完條數計唔掂就拍拍屁股走左......攪到我，一鑊粥......

二來，係叫佢發盈利預警，即係好似D科網股咁，話比你聽，拿，我賺唔到咁多架，你唔好以為我賺得到呀！我叫佢，總之有咁衰講到咁衰，點知佢好似食錯藥咁......

點解我要唱衰自己? 唉，你話呀，我咁全心全意推gst，做既所有野，梗係都同呢樣有關啦！等我有借口，話唔好諗住靠自由行呀，而家連大陸哩都唔黎啦，我地做唔到遊行生意，無人交稅，我點開支票先得格? 咁，咪好大個理由開gst囉！我知，一個理性既香港人，實同意格！

至於第三個目標......well，你諗下我點解叫佢去埋東涌? 佢要乘搭咩交通工具? heeheeee，唔講得，中央國家機密！

垃圾會介入.....好煩

死啦死啦，估唔到甜甜佢地班人真係黎真......真係唔講你唔知呀，佢地同白鴿黨，夾埋要係垃圾會講GST呀......而家比白鴿黨花旗森抽到籤講....唉，雖然話無法律效力o者，但都係一件令人好頭痛既事......萬一佢地真係過得到，講個垃圾會反對，跟住落去都唔知點攪......。老實講，我當然可以唔蒲頭啦，叫肥馬食左佢....攪掂果班林善聯咪就攪掂囉...而我即刻攪個visit去南沙都唔係唔得，不過有d樣衰o者......，好似我好驚咁......

不過，唔係喎...拿，煲煲份 C 政報告11號公佈，佢實比人問格....咁我跟番佢講咩，我講咩咪得囉.....唔知我個稿咁樣得唔得呢...

「多謝花旗森議員提個咁無聊既動議，仲多得你唔少...我話無聊，係因為你地果班白鴿BB跳晒海咁反對gst，驚死我唔知，使唔使再係個垃圾會度講呀，你咁即係迫我表態o者，拿，做人既野，唔好去到咁盡喎...俗語都有話，今日留一線，日後好相見...」

「仲有呢個咁既鼓油黨，我話晒，以前同你地都係兄弟丫，你地使唔使全部入motion都入反gst咁串呀，擺明要置我於死地o者！」

「我不得不讚下林善聯為人之正直、不單止無係門口示威，仲為左要個motion過唔到，特登投棄權...我都明白你地好難支持，出面班刁民係好難服侍既，呢d我明嫁啦，第日d咩要求，例如係邊個區加d咩咁，其實，果度好少錢o者，一旦收到gst，就好易話為。」

「至於假髮黨，我實在覺得你地太伙吉士啦......湯湯，你同我講電話果陣，明明都話好支持，點知你今日，居然投棄權......仲帶班人黎示威，你果然係為反對而反對既反對派......我以後都唔同你玩架啦！」

咁會唔會唔係幾好呢，可能斷絕後路喎.....但係，我都係盡地一煲架啦，仲有咩前途呀....咪報仇咁報喎......

不過唔係喎，不如叫亞甜甜將d問題問煲煲呀，佢本 C 政報告有答問大會......問佢好過問我丫麻.....

煲煲走走學院風采

政治家、政客、政棍！

哈哈，煲煲話自己係政治家喎，真係笑死人，如果佢係政治家，咁我諗政治家既定義要重新改寫：一個只講不做、但做親既野，都無樣成功，呢個就叫政治家啦！

點解? 唔係掛，咁都要解? 佢一上場，即刻帶果班飯民上大陸(記住，其他上到去果班，只不過係陪襯品！)，諗住利誘呢班人支持佢政改，點知比個七十八歲亞伯隊?......！跟住西九?埋......你記唔記得佢做過d乜野丫? 唔記得...係正常既。

佢叫亞spin doctor，同個拍膊頭老友大學政治系單眼佬主持個show，今日去大學表演，然後話，拿我呢d呢，就叫務實啦！嘩，唔係卦? 十幾皮請件咁野返黎，就係叫佢找老友開show呀? 我都係要小心d啦，不如叫核數check下佢一日到黑做緊咩啦，係咪同女朋友講電話就叫做公關啦......！

咩叫政客? 等我將佢現形啦！我同佢做咁耐對手.....嘻嘻.....其實佢今日想同d學生講咩丫拿......


鄭維健博士、劉遵義校長、各位嘉賓、各位老師、各位同學：

　　很高興今日能夠在xx大學走走書院周會與大家分享我的工作經驗。

　 　我頭先係外面，見到咁多人圍剿我，真係嚇到腳都軟埋，你知啦，我以前個老頂，即係最近黎賣過書果個鬼佬呢，佢當年黎頒學位果陣，駕車都比人圍住呀，何況我.......。我當時亦有些猶疑，唔知會發生甚?事，例如會唔會有人話我係「誠哥既馬房」呢D政府機密，又或者有無人擲雞蛋等等，因為我無帶第二套衫，同埋我EQ好低，好容易面黑，等陣，俾人擲親，控制唔住面黑就唔好啦。

但我今日黎呢度無失望，果然有同學在外面擾嚷(擾攘先岩呀---我都話政府D新聞官中文差架啦.......擾攘都錯.......佢真係以為擾「嚷」係係外面叫，真死亡，仲話要弘揚中國文化........)，但卻令 我感到一個事實，就係錢就係權力......當年政府迫呢間大學由四改三，結果佢為左錢，歸順左囉！連學生都順服晒囉，連示威都唔敢，簡真就係同我今日講的「務實政治」同一鼻孔出氣，算我無黎錯呢度擦鞋！作為一個從事政務的人，當然要講責任，但年青學生一定要講理想、夢想，不能好似你地D同學咁講太多實際。如果你們每一個人 均接受現實、滿意現實、安於現實，社會動力在那?？所以每一個年青人都要發表他們的意見、追求他們理想。當然，你地D理想，最好唔好今日用啦，用黎對付D反對黨就最好，對佢地一定係一個大的警惕，亦係一個好既 反思的機會。但對於當權者黎講，你地既理想，只會令我諗起鎮壓，所以你地真係要好自為之。從這方面黎講，我很感謝今日同學充份合作。但係你們提到的最低工資、標準工時，令我實在覺得你地好低水平，更加質疑劉校長無迫你地必修ECON 101係錯既決定......當然，呢個亦係我好想解決既問題，即係快手隊?果班成日話要最低工資的工會人，同埋話要最長工時的X家富(貴)。我感謝你們比藉口我隊?佢地，等我可以耳根清靜......。你地鍾意就繼續嘈落去啦，I don't care. 但係我可以肯定......到我唔做果陣......你地會掉轉頭遊說我，唔好實施呢D法例......。

............(下刪一萬字)

作死咩，寫咁長，改死我啦......不過，拿，從上面既版本，你地應該明白煲煲係一個咩野既人。即係咁，佢最難頂既，係佢真係覺得自己係政治家！

佢話自己要做到「預知明天、下星期、下月、甚至下一年將會發生的事」，但佢話做政客仲難，因為要「不單要有這種預知力，而更重要的是，當事後發現之前預言的事最終沒有發生時，他還要能夠解釋得頭頭是道.........」

丫，唔知點個，當年話睇唔到香港既稅制有問題而要改革，後來又話有結構性赤字，要研究，而家又唔話有結構性赤字架呢? (你唔好以為係我呀，我果時，仲做緊商會主席呀！)

唔知邊個指鹿為馬，話政改方案令香港更民主架呢！

又唔知邊個，明明話推GST係成個政府既決定，跟住就快閃架呢?

呢D咁難做既位，你知唔知叫咩呀?教你一個詞語丫，呢D叫政棍呀！

GST係溝女稅.......唔係fa~~~~

(多謝feheart君創作如此《GST 銷售及服務稅 - 溝女稅!?》)(你咁樣破壞特區政府施政、攪我個baby，我一定會叫稅局收你貴d稅以示報答！)

死啦，我今日，收到個電郵，講咩? 你睇下啦，我知我知，你睇完梗係笑到反艇啦，但係......我真係好頭痛......因為我不敢回憶，但未敢忘記......我諗你都唔會唔記得.........六四? 唔係丫，你記唔記得，零二年果陣，自從九月掃把頭出左果本諮詢文件，就開始越黎越多D關於佢啦，關於老董既笑話......，我仲記得，掃把頭話如果佢捍衛唔到佢個掃把頭，佢就唔再係掃把頭......！

我始終有D懷疑，當年七一咁多人上街，唔係沙士，係呢D咁既笑話......我今日叫左助理去收風，包括去下D谷(即係newsgroup，唔係快活谷)睇睇有無D咁野先......試下水溫......

-----------------------------------------------------------------------------------------------
GST 銷售及服務稅 - 溝女稅!? (Girls Seducing Tax, 又名Girls Solicit Tax)


政府向廣大市民作諮詢,而作為一家四口住幾百尺屋,每天搭巴士上班的典型打工仔,對於政府

開徵此新稅的意見及觀點,相信在未來諮詢期內會被討論上萬次.....
所以本人在此無需作任何意見....反而,本人極希望為一眾血氣方剛,感情豐富的年青人對開徵銷售稅表達反對的意見.原因非常簡單,就是本年青人對此稅一開所聯想到的就是....

"咩話?!咁咪即係連溝女都要交稅?!"

無錯,GST (Goods and Services Tax) 標示著幾乎所有消費都要交稅,而作為物質主義社會的典型,在香港溝女基本上跟消費是完全掛勾,故此,不論是豪華型溝女,送手機LV重鑽歐洲一月遊演唱會第一行戲院包廂直昇機接送玫瑰九十九;還是心意型溝女,長洲一天遊戲院第一行演唱會最後一行皺紙褶花陪女深夜歸家搭小巴都同樣要交稅...亦即是只要你想溝女,就要交錢比政府,而且溝得愈多,交得愈多......所以GST 我們可稱之為"溝女稅" Girls Seducing Tax, 又名Girls Solicit Tax


政府開徵溝女稅,影響可謂極之深遠.......

首先,在港溝女的成本必然上脹,對港男本地溝女意慾做成一定打擊,此舉不但對男性有不良影響,而且現時香港本已女多男少,再加上男性北上溝女的情況將因此而大幅加劇,香港女性有可能要面對"爭仔"的困境.....

再說,由於男人以貌取人之劣性,美女的追求者數目理論上無論溝女成本高或低都一樣是多,經濟學上稱之為需求彈性低(Low demand elasticity/demand inelastic),相反,對於需求彈性較高,其貌不揚的女性,追求者數目則可能大幅下滑......美女追求者本多不減(什至可能升),凡女追求者本已較少還要一跌再跌....意味著繼貧富懸殊後另一極大社會分化- "美醜懸殊"......

另外,如果男人大多有以貌取人之劣性,女人則大多有貪慕虛榮之缺點....所以有錢仔在溝女方面本來已佔有極大優勢,在加收稅項後,窮家子弟不單只百上加斤,而且在本錢上,跟有錢仔的距離將會愈來愈大....令不公平的情況加劇.....

當然,溝女稅也不是一無是處,港男可能因此放棄物質,轉移以創意和情趣來取悅女性,令香港向來缺乏的創意思維有所提高;另外,利字行頭,事事講金的女人將更加不受歡迎,大眾男士將更懂欣賞節儉平實,愛惜男人荷包的可愛女性......
不過,由於之前提過的男女根本劣根性格,以上兩個優點將難以實現....女:"創意情趣?!唔好玩la...個LV 收埋係邊?"

男:"我比較懂得欣賞美女多於欣賞節儉平實...."

所以作為時下熱血青年.....反對銷售稅看來是必然的事......溝女要交稅....實在太
令人沮喪.....
如果政府堅決而行,我本人只有兩個要求

第一,供養三名或以上女友者,應享有一萬元免稅額
第二,如果失戀..................可否退稅?

接吻,是不用交稅的.....以後大家多點接吻,少點揮霍....

貧駛乜扶? ── 特別呈獻：書面語版本！

今日有報紙話我呢個BLOG用「嘻笑怒罵和市井小民的語言」黎寫，「已告訴了他不是財政司長唐英年」(http://www.singpao.com/20060927/feature/876951.html)......WELL，寫BLOG係要用口語先好睇架麻............咁樣先好似我同你傾緊計丫麻.......寫書面語唔係唔得......果D慣左將D政府生硬英文譯做奇怪中文的AO式新聞稿中文我就寫唔出啦！呢篇既內容同上一篇一模一樣，唯一既分別係呢篇用書面語黎寫，如果你睇得晒唔click左佢第二度，證明你好有能耐囉！
------------------------------------------------------------------------------------------

今天主持扶貧會議。其實，本人早已提出解決本港貧窮問題的方法，而毋須一而再、再而三地討論其他方案。具體而言，本人認為只要政府能夠成功落實諮詢中的「商品及服務稅」，每名香港市民，便可以從商品及服務稅的收益之中，獲得每人每月五千五百元援助金，即若以本港最普遍的四人家庭為例，每月收入將高達二萬二千元。此收入水平將遠高於聯合國所訂定的貧窮線水平，香港的貧窮問題便能迎刃而解。至於資源方面，則並非如一前任高官所指「天跌落黎，樹生出黎」，而是由全港市民共同負擔！

然而，要令所有市民達至上述收入水平，商品及服務稅的稅率，粗略估計約為百分之三十。然而，由於援助金也屬於收入的一種，屆時，領取綜助金的人士同樣要繳納入息稅(即現時的薪俸稅)。故此，一旦商品及服務稅得以落實，稅收水平約為每年一千八百億元。本人將會重新分配這筆收入予全港市民(包括本港首富XX誠，其發放機制與現時長者「生果金」相同，但沒有年齡限制)，其後，政府會按現時薪俸稅的稅制，要求所有市民納稅，所得稅收將會用於提供社會福利、醫療等方面的服務。本人相信，這個方案是達至一個最公平的稅制！

本人得悉一群非政府組織最近成立「公平稅制大聯盟」(由於涉及到團體名字本身的邏輯謬誤，故此必須公開全名)，但基於稅制具有隨意性的特性，任何稅種都難以達致完全公平。舉例來說，納稅人進修的學費可獲扣減，但子女的學費，卻不可以為父母扣稅用。再者，若長者與納稅人同住，所獲的免稅額較分開居住為高──雖然理論上與父母同住，納稅人的開支較少。然後，本人發現到若以絕對數值比較，政府必被民間挑戰其在比例上的不公平，反之亦然，此乃任何反對黨在任何時間均有理由反對任何政策的原因──雖然本人永遠無法明白為何反對黨總沒有獲得市民的支持！

本人一向樂意聽取民意，故現已採納民間意見，訂立一個公平的稅制機制。

由於落實上述措施後，即使失業人士也因符合繳稅資格而被納入稅網，根據本人推測，屆時所有市民均能擺脫貧窮，成為納稅人的一份子，扶貧委員會也便完成其使命，功成身退。

本人對於有人批評上述公平的措施為在本港引入「共 產主義」不敢苟同。香港一直是全球最自由的經濟體系，日前更獲世界經X論X評為競爭力上升，故此，根據馬X思同志的歷史唯物論，香港正處於一個階段性的演變，即資本主義，但其後將會出現物極必反的狀況，無產階級很快便會因為思想的解放，逐漸取代資產階級。根據本人的推測，在落實商品及服務稅後五年內，這種情況應已達到成熟階段，這也是本人為全港市民提出五年內商品及服務稅稅率不變的原諉。

故此，本人實在無法理出扶貧工作的需要性。
---------------------------------------------------------------
如果你可以睇到呢度，咁有耐力，可以參加三項鐵人賽啦！

貧駛乜扶?

今日開扶貧，其實，計我話，要扶貧好簡單，比我開GST咪得囉，都唔明點解要傾咁耐，開到GST，每人每月綜援$5500，一家四口就$22000，咁咪無晒窮人囉！錢從何來? 唔係天跌落黎，樹生出黎，當然係你地比啦！

不過咁，全港600萬人，要做到呢個水平，GST要收到30%！不過咁，由於綜援都係收入，所以呢班人都要納稅。即係話，到我開到GST之後，先由全香港市民捐出1800億比我再分配，然後每個人(連誠哥都有，同生果金一樣，而且年齡不限)分到之後，按薪俸稅(到時叫入息稅)的稅階再向你地收番稅，然後，我就會將D稅，用黎做社會福利、醫療............。架??屋? 咁樣最公平丫麻！

果班咁既ngo，攪個「公平稅制大聯盟」(本來唔開名，但係要講既係個名本身既攪笑，用左假名就講唔到囉.....)，稅本來就唔公平架啦，點解大人讀書有得扣稅，細路仔讀書無得扣? 點解同老豆亞媽住可以扣多D丫? 一齊住應該使少左固喎......我用ABSOLUTE value 計，d人就用proportion同我計，我用proportion 計，d人就話absolute value差好遠.......所以呢，做反對黨真係易到暈，都唔明果班咁既反對黨點解做黎做去都做唔起！

拿，咁我而家就公平比你睇囉！

你估到時會點丫拿? 香港就算失業果個，都要交稅架啦，咁就符合到我既原意啦！咁佢地都要交稅咯，仲點會係貧窮? 無人貧窮，又點駛扶貧? 咁個扶貧委員會，咪可以摺埋囉！

共產主義? no，我地係走在資本主義的前端，根據馬乞嚏的歷史唯物論，資本主義係一個階段性的演變，香港不嬲都係全球最自由的城市，前日又話競爭力上升，其實已經到達左馬乞嚏所講物極必反的境界，無產階級很快便會因為思想的解放，逐漸取代資產階級......我既估計，係實施GST內五年，所以，我保證頭五年唔加稅就係咁解！

So, what is the point of 扶貧?

糖老鴨與米老鼠之戰

嘻嘻，我一早就預告左，話要將煲煲既民望質番落去.....拿，我無厄你架，今日亞鍾陰乾個民調呀，話佢一開口講GST就跌啦......，拿，你知啦，佢過幾日就會宣佈 C 政報告，到時答問大會，果D咁既垃圾會議員，仲唔趁機質佢咩? 佢實要答，又視直播喎，死硬啦..........我會唔會跌? 我已經跌到底啦，就算唔升，都唔會再跌...所以，我會連食奶既力都出埋去推GST。

不過，今日，果隻死蠢米老鼠居然跳出黎講話GST影響其他公司黎香港投資.......佢真係未死過，我助理收到風，即刻碌入黎問係咪我既策略去跣煲煲，佢又係死蠢，係自已跣人定係比人跣都攪唔清.......不過又唔怪得佢既，而家都唔知邊個係朋友，邊個係敵人......

我聽到呢個死蠢講D咁野，即係CALL佢上黎，問佢係咪想返歸做老鼠，佢居然仲夠膽駁咀:

Mouse: I was just reflecting concerns of potential investors. My assigned duty is to ask outsiders to come and invest, and you now say that you have to "promote" the fxxking GST, in order to fix the non-existing structural financial problem. You don't think those investors are prats that they will be fooled so easily. I was interrogated by everyone everytime when I went out for road shows.......how about swaping....

TongTong: ...God damn you that you want my job........I don't care how difficult your job is. It's your job. If it's so easy to do it, how come you earn such a world class salary for doing nothing but travelling around. I warn you now, don't expect that you're superior just because you speak English. Just get out of my office and fix it within an hour. I need to see the press release on my table before I leave today...

Mouse: You're so unfair.....

TongTong: I don't need to be fair as I am your boss.....get out NOW!

呢隻咁既老鼠，居然無神神跳出黎講埋D咁既野，真係想我死......但佢為咩要咁呢? 佢實知呢個係政府政策格，點解會講句咁野呢? 莫非..........煲煲唔憤氣佢民望又倒頭落番去? 跣我? 好，等我借D倚，擺個陷阱俾佢先！

好得閒...

無事做！諮詢會又做完咯，咪無野做囉！

今日無做過野，白逗一萬蚊人工.....不過都唔夠買支?紅酒！

唔好好似某報咁，話我大花筒呀，係就話左煲煲先啦，佢帶D人去遊山玩水，去幾日政府就無左十幾廿萬啦！去傾生意? 唔好同我玩啦，你梗係唔記得左我以前做咩啦，呢D咁既團，我一年唔知去幾多趟啦，去到咪比班大陸官借D倚大宴你地，然後一晚開十幾枝紅酒加五糧液開公數，去到尾，個D咁既省政府D Project根本就唔會比你做。佢地會叫你上去present，但pre完，將你d技術細節拿到手，就比自己d公司做。呢d咁既技倆，都唔駛我自己上去睇，亞爹一早已經講左比我知啦。

佢話，以前果個年代d人，偷渡、走難落得黎果d，somehow都有d鬥心，比較「高級」，唔落黎果d，well, no comment喎！

so, what I mean is that 唔好以為佢帶d人上去係會帶好香港經濟.....其實無咩作用.......。

其實我今日，成日係office玩game之麻，咪係果個醫生局長玩既「珠寶」方塊囉(唔賣得廣告，你地自己查舊報紙啦)，佢話電腦版都有，仲download左個係我部電腦，原來真係幾好玩......講起又想玩添.....係咁啦！

點解唔用得任獨裁D錢?

失策！我一心諗住，學李資政咁，控制住個諮詢會可以講野即人，就可以做得好好，但係，我唔記得左，佢地唔係會場講，可以係出面講.........早知做新聞封鎖，即係唔准示威，唔准記者係會場方圓五十里出現..唔准打手提電話, sms.......anyway，應該係，除左我講野准報導，其他人唔准講野，唔准評論...唔准......不過，如果係咁，我點解要攪埋d咁既諮詢會?

唉，算啦，反正我都係做下樣架之麻.......我都唔想推，攪黎攪去，咪都係煲煲迫我推之麻，所以果D咁既政黨，走黎問我拿推行細節喎，我邊有o者，........煲煲就精啦，自己想做大政府咯....小政府? 佢講架之麻...佢都話會干預咯，你聽唔到咩?

俗語都有話「無水行唔郁船」，佢要做大政府，都要有錢先得格。本來，佢要做大政府，大可以係任獨裁度出數，但係佢果時入市，又話人地係三流分析員，已經攪到果班評級機構好唔妥佢，如果佢開夾萬，d評級機構會好開心，因為有藉口插佢.....插人呢家野，中外都係咁嫁啦，唔通鬼佬無辦公室政治咩.....仲有一樣，你地可能唔知，就係亞任獨裁就黎退休，呢樣你地千祈唔好爆出去呀，tap電話聽到架......但無向法官申請......btw，講到邊? 丫係，如果呢個時候去開任獨裁個夾萬，會攪到佢真係要交貨，要掙多D錢返黎。

大家睇左咁多年，都知其實任獨裁根本就唔識投資，咁樣會比好大壓力佢架麻，仲可能拆埋佢個貞節牌坊添......，臨老入花叢就唔係幾好啦...。

去到尾，其實最好即方法，係叫跳水松返黎，唔係做我個位，係掙錢呀...點解? 佢識炒丫麻.....?

muggle 低水平......

嘻......尋日個諮詢會好順利，其實做得順利既原因，係因為我決定唔比記者入去諮詢會會場，攪到好似開社團會議咁......你知啦，入去果D你我揀過架麻，幼稚園未畢業既優先，出黎講野果D人，根本就形容唔到裡面發生咩事.......咁就算有D長毛咁既人，都無所謂...何況，根本唔會有，咁我呢台戲，就梗係攪得好過亞煲煲果台啦！

BTW，其實都有人問問題架！拿，我同你分享幾個CASE啦！

三姑：我叫三姑，三姑村村代表，亞糖司長，我想問下呢，第日我打十五糊，贏到錢，係咪都可以收稅? 我地成條村無人做野架，個個都淨係賭錢，係職業賭徒黎.......
糖糖：亞三姑，你下次開檔叫埋我，我免你稅啦，我真係搵唔到人同我打十五糊啦......

六婆：亞糖司長，即係呢，你呢個傷口稅呢，即係係咪我呢，個身有傷口，就可以去拿錢?
糖糖：六婆，有傷口要睇醫生架！

小強：亞糖司長，我想問，你地政府應該先慳下D錢先諗開稅丫麻，拿，我樣樣唔講啦，你就梗係英明啦，但係你地果三屍十一命，有D都真係好花錢，你諗下，我地又無得選舉，果個D9有咩好做O者? 佢一年收一億喎.....養好多人架！仲有仲有，搵個醫生去做教育，佢淨係識楂刀，D學生有樣學樣，攪到D學生，唔係拿刀，就係拿棒球棍返學.........仲有仲有，果個眼科醫生，同人醫眼，自己有眼無珠都唔裝番隻假眼，抽支下下籤，攪到全香港雞毛鴨血....咁經濟比佢攪到咁差，政府無錢，冤有頭債有主，你政府有咩唔夠錢用，係咪應該搵佢唔係搵我地D小市民呀?!
糖糖：小強，即係啦，我諗你有D誤會啦，不如咁，請你去一去後台，我地D同事會同你補一補習！

式經濟：司長，我叫式經濟，有名你叫，我式經濟，都讀經濟，有經濟博士學位......即係啦，銷售稅呢樣野，會令政府好容易想駛多D錢，令整體社會無咁有效，因為政府多左錢，會有多好多空間，去做好多野，咁好多人，就會覺得，與其去搵生意，不如搵政府，去游說政府「做D野」.......呢D係經濟學上叫做RENT SEEKING ACTIVITIES.......我地明明話係小政府...大.......
糖糖：呢D咁低水平既問題我唔答，下一個...

就係咁.....我就攪掂左個諮詢會。

有時，我都幾佩服亞掃把頭，佢夠膽講話「唔通計程車司機、酒樓侍應、麥當勞服務員會〔就二十三條草案〕逐條同我討論？草案都係專家去睇；好似立法會議員、法律界同埋學者。」

就係咁，佢就拒絕出白紙草案.....

BTW，呢一兩個星期，好似有D暗湧...果D乜界物界，個個都做調查，個個都話佢個界別唔同意GST，真係要做D野，千祈唔好攪下攪下變左第二個廿三條。講真，呢個都係我都煲煲鬥爭既工具o者，都唔明點解D muggles咁都睇唔到.......? 唔通我真係要推咩? 但就算班香港人睇唔到，唔通果d咩政治學者都睇唔到? 仲同我猛咁講咩香港有儲備有咩用? 根本，個問題就唔係有冇錢，係煲煲丫麻.....唉，都話香港既muggles水平低，重話要普選喎，真係，發夢無咁早啦！

成功爭取整蠱全香港市民！

點解係叫「成功爭取」? 因為興囉！有d議員，丁咁多都話自己有份。我最跨張見到的，是有個垃圾會議員，居然話自己「成功爭取廿四小時通關！」你信唔信?
佢咁都得，咁我點解唔可以「成功爭取」?

我話你知丫，我真係一個政治家！

你知唔知尋日呀，我攪諮詢會，好似我做楝篤笑咁──雖然我係坐係度。因為我晨咁早已經做左好多預備功夫，所以入到去果d人，其實，全部基本上都唔會反對gst........我點攪到咁樣? 你睇返 和平有秩序的GST諮詢會，你就會明白架啦！

假諮詢? 哈哈，點會呢? 因為反對果d，佢已經係出面示左威咯，咁贊成果d無示威，我梗要比番d空間比佢講先得格！如果反對果個係出面又講，入面又講，咁佢咪有雙重機會囉? 不過咁喎，出便示威果d，唔會當係正式表達意見，入面支持果d先算！

聽日市民收到個message，就會係「市民支持稅制改革」，咁即係全港市民都支持gst啦！咁其實，你記唔記得我個諮詢叫咩名? 唔係銷售稅喎，唔係GST喎，係「擴闊稅基 促進繁榮」呀。市民都同意香港稅基窄咯，咪即係支持我囉!!!

同意稅基窄 = 支持稅制改革 = 支持擴闊稅基 = 支持諮詢文件裡面唯一可以擴闊稅基的建議 = 支持GST！

根據最簡單既數學邏輯：同意稅基窄 = 支持GST！

你話我係咪好聰明呢！因為亞甜甜，都同意稅基窄架，佢無得反口架啦！

咁跟住我地去d雞議會，就可以話，市民同民意代表，基本上係同意「擴闊稅基」。如果你睇過份文件，你都應該知道，我提左一個方案咋！所以，同意擴闊稅基既人，就必定係會同意gst.....咁全香港既人都會支持！！

叫我去女人街諮詢市民? 傻啦，唔得架，我梗係唔敢去啦，我公子黎架麻，點去得d咁既地方? 但係我梗係唔可以咁講啦，我公開既理由，係因為，個sampling唔好丫麻....去得旺角果d，又鍾意買野，但又無錢喎(有錢個d好少去旺角.....)，我去諮詢呢班唔合理。拿，今日仲有一場呀楝篤笑呀，留意海報啦！
----------------------------------

BTW，原來......日日寫，真係好辛苦......你知啦，我唔可以係office 寫架麻......比人見到咁點算呢? 比人知道真係我寫，我就一身蟻啦，我咁寫煲煲，煲煲實會「去到天涯海角」(其實，可唔可以話比我知，「天涯海角」係邊度? 係金沙?)，都會搵我出黎秋後算賬──所以呢，前晚返到黎，見到仲有咁大?文件要睇，預備下尋日個諮詢會，所以偷左一晚懶...heeehee....

李資政果然好野

唔怪得煲煲去獅城取經......原來獅城真係咁好......

你知唔知，有時真係要放下假先諗到野。我今晚返到黎睇西報，先睇到原來我係獅城果陣，新加坡「長毛」徐順全，想行去我地開會果度，結果，比警察阻住........警方廿人包佢一條友...........仲有，原來佢已經比亞李資政告到破產......仲有，原來係獅城，派單張係唔得架..........

原來，我地偉大既祖國係咁開明架！Oh...我又感動到想跪拜我地偉大既毛主席、鄧主席、江主席..............啦...

你諗下，新加坡隔幾年都會重選國會，話晒都係民主國家，雖然........我唔知亞李資政諗左條咩橋，令國會只係得兩個反對黨.......(唔怪得煲煲去獅城取經啦，我諗佢都想個立法會得兩個反對黨)......

我地偉大既祖國，雖然自己未有直選，但係居然比我地果D咁既衰政黨係度派單張、係度開記者會、係報紙寫文、做調查、跳海、攪遊行............嘈喧巴閉......煩住晒....，你諗下我地既祖國，係咪仲開放過民主國家呢? 我地唔單止與國際接軌，仲已經超越左獅城.......就快會超英趕美啦！

所以呢，如果我做左果個位，我一定會駁斥果班所謂的飯民，話香港比獅城有民主的國家更加自由.......同埋會同佢地講，佢地可以揀，好似獅城咁，可以有選舉，不過唔可以派單張、遊行、開記者會、同埋選反對黨果D區，唔會有地鐵！................睇下佢地揀邊樣...我無迫佢地架，有得比佢地揀架.......

仲有仲有，我又可以學下李資政，但就唔係告誹謗，告咩呢? 告泄漏國家機密(話香港無結構性赤字喎......點可以比人知架)、告佢地違反基本法、危害香港金融穩定、危害政府收入來源.........告邊個好呢? 甜甜丫，佢帶一萬人遊行......仲唔係威脅政府? 如果有廿三條就告左佢啦......不過佢比較有錢，好難告固喎.......

不如告白鴿仔同埋SOCO何...哈哈哈，佢地咁鬼窮，一告佢地，就嚇到腳都軟埋啦......不過.....佢地有個爆缸仁仁喎....佢真係同我輸身家，輸埋條命都唔理固喎......咁.......有辦法......先吊銷左佢個律師牌先咪得囉！..........先告佢：因為自己接生意賺錢比人爆缸，浪費警力，如果佢日日接案，日日爆缸，咁我咪要請一隊警察比佢? 仲要請另一隊人去天涯海角(其實即係係邊呢?)去捉賊，仲要先搵到邊度係天涯海角，然後先去捉賊，好貴架！..............所以為左特區既財政安全，以後唔可以比佢接官司......哈哈，攪掂........哈哈哈.....我真係好聰明呀........去一去獅城，比亞李資政好似達賴喇嘛神遊咁上左我身，真係人都醒D.........李資政萬歲萬歲萬萬稅！

行歪議員加把咀跣我.........

今晚未同亞娘傾過計，好掛住佢添......我係新加坡丫麻.....in case 你唔記得.

岩岩先同其他人吹完水返黎，因為好多其他國家果d官都問GST...我仲以為唔係香港可以唔駛諗，點知仲要由頭開始解釋過....世銀同IMF既官方版本，梗係想香港有啦，不過，佢地其實私底下，最關心既，都係第日黎香港買名牌，會唔會貴左......尤其菲律賓、泰國.....佢地好鍾意係香港買名牌，因為香港無關稅，所以名牌會平過其他國家，佢地驚有GST，同佢地國家差唔多，咁就唔抵啦......！

WELL，我係咪都要諗下啦，不過，好悶......
------------------------------------------------

我唔係香港，果D行歪議員真係逐個跳出黎講GST喎......先係最唔話得既振中哥，不過，我都唔知佢係幫我定係跣我.......講真，其實佢都想做，佢隊完煲煲出黎講野，煲煲食左一棍，無論係為左鬍鬚仔，定係為左啖氣，點都唔會放過佢，所以要佢都食番一棍......所以煲煲都迫亞振中都要講一次.........不過，講到講野，亞振中哥點都係高一皮。所以，佢可以講完無人記得佢講過，就算講咩題目，都完全唔會受損......！

但係呢，佢好講唔講，講結構性赤字，我真係死比佢睇，都唔知係咪專登比蕉皮我踩......我早已經比白鴿仔係生果報踢爆左啦，仲有咩好講o者，咁你叫我返到黎又比人質係咪有結構性赤字，咁我點答啦? 到時，無人記得邊個講呢樣野，但係就記得有人講個呢樣野，結果咪又係我食左著死貓......我初初，仲以為佢係我幫架添..........

唔通叫佢地睇番生果報，睇下我幾咁瘀咩? .........傳媒政客大合奏，誠哥真係講得冇錯.........誠哥真係有遠見......

呢國混血兒夠係啦，無啦啦跳上電台講咩gst啦.....講唔係唔好，但係佢做咩走去講獨立王國個夾萬o者............係人都唔鍾意任獨裁(即係獨立王國姓任果個總裁......佢獨唔獨裁我唔知，但咁樣比較簡單)，嫌佢人工高，混血兒越講，D人咪越覺得任獨裁唔應該要咁多人工，同埋真係應該用咁D獨立王國D錢...................咁等陣間，果D咩前點卿呀，白鴿仔呀，又係度嘈喧巴閉講又開多個火頭，到時我真係死都唔掂........邊做得咁多野呀?

如果我係香港，我收到風佢地上埋D咁既節目，我實叫我D o靚，比個briefing佢地，等佢地唔好講埋d咁野跣我.....................

致：自稱公信力第一報

編輯仝人好！我糖糖在此對於貴報對本網誌的鼎力支持，令得廣大市民對於本人的內心世界、政府的運作，以致對於GST的好處有更深入認識深表謝意。倘若沒有貴報支持，本網誌不過是小圈子自娛的玩意，多得貴報大力宣傳，利用貴報珍貴的版位宣傳，其效力宏大不但令該日有近1800人閱讀，更令遠至亞美利堅合眾國、大不列顛國、日出國、楓葉國、南方國以及我地有十三億人口的偉大祖國都有讀者，令本人感動得有如看見我們偉大的祖國國旗在殖民地升起，以及金紫荊被自由行用作?鼻涕一樣感動。

老實講，我糖糖都真係唔想推GST，只不過坐係個咁既位，身不由己咁解。如果大家有睇過生果報的報導，都應該知道我本來就好反對.....，所以，唉，真係好大壓力......，呢個網誌，SOMEHOW都係我減壓既方法之一，其他方法，當然包括飲番兩杯啦。

我糖糖要感謝本港居民互相傳遞訊息之功，不少朋友在自己的BLOG或新聞組內廣加宣傳，他日有如中秋起義成功推翻銷售稅，這些朋友都是無名英雄應記一功。

不過，既然自稱公信力第一，貴報的宗旨乃應以民為本、福為民開，擔當貴報應擔當的第四權角色，而非透過貴報超強的滲透力，去為政府找出誰人撰寫這個網誌！貴報既然尚有些經濟人才，懂得說什麼炫耀性消費，必然懂得GST推高產品價格降低需求的道理，對香港焉有好處? 卻只會肥了政府去做些沒有意義但浪費金錢的事，例如攪馬術賽、東亞運動會，只會助長尋租行為，到時，貴報成本上漲、銷量下跌，難道學其他行業般苦求政府扶助嗎?

我糖糖老實告訴你，亞爺的口味不是你這一種，貴報無論如何不能上大陸。不要以為討好政府會有機會！所以，你們還是努力做好你們的本份，不要毀了查老先生一生的心血吧！

抓住最堅實支持者：假髮黨Band佬湯.....

嘩，死鼓油黨，真係你講晒啦，要收稅果陣就話支持簡單稅制，要補貼果陣就話佢果D行業又幾咁重要......我問佢地錢從何來佢地就NONE OF MY BUSINESS....真係一時一樣你講晒，豈又此理?

當然，我梗係無辦法咁樣官式回應佢啦，但係我話過一定唔會就咁算架，點都係垃圾會搵機會寸返佢地，如果唔係我顏面何存呀?

果D咁既政客都係無個好，有事就鍾無艷，早幾日假髮黨亞BAND佬湯 (唔係靚佬湯，唔好誤會)打比我，叫我出席佢地個總部開幕，第一果日有個GST諮詢會，我一定有藉口推左佢；不過我點都話考慮下......，講真，而家佢係成個垃圾會最有可能支持既so call政黨，但係佢地內部都未打飽....淨係係度話「成立工作小組」研究，實在係由贊成同反雙方開片，而家仲未知結果如何............我都要搵D辦法迫佢地表下態支持先得......

糖糖：亞湯湯，你地傾成點呀? 你都知啦，佢地三個大黨好大壓力架....一開垃圾會，佢地又攪D咩動議，我諗你地都要快D架啦.....
湯湯：我連個名都同咁似你，我好支持架，你知啦，我地有個社福長毛，如果要佢支持，佢雖然唔會跳海，不過會退黨，仲有亞師奶，佢初初都想支持架，你知啦，D會計行老闆會發到豬頭咁架麻，但你亞肥馬迫佢表態，佢做完問卷返黎，佢D選民反對.....原來D會計師已經做到頭都暈，你重要加稅，佢地又唔會加人工，真係睬你都傻......而家亞師奶轉唔到喎。另外果幾個，都好擔心D選民好大反彈，你知啦，我地本來以為一組黨就有過千人爭住入黨，點知而家，左搵右搵，有質素果D都唔肯入，佢地幾個都好擔心選舉D票會跌得好緊要呀，雖然佢地心裡面都支持，但都未敢講呀.........你見我幾難做先得格?
糖糖：咁你都要有D勇氣格......仲有，你遲到都要表態架啦......
湯湯：我知，我諗緊架啦，咁你都要比多D野我地先得格....等我地有D數據支持呀！同埋，你都要幫手遊說下先得格，淨係得我講，佢地唔信架，你知啦，我又唔識經濟，唔係專家麻......
糖糖：湯湯，唔好玩我啦，你都知，一將條數攤出黎，就點度都唔使去架啦，除非我諗住蝕頭 賺尾o者，但係而家唔賺都攪唔掂，如果講出去話蝕頭 賺尾，我驚有五十萬人遊行咋......
湯湯：咁呀，我唔理架啦，你無數據，我咪唔講野囉！
糖糖：星期五果度，我諗諗啦，不過，好難架啦，我都唔知個諮詢會會攪到幾點......


真係丫......又想我去，又一D位都唔比我......不過唔係喎.......，去會唔會有幫助呢? 但去左咪仲大鑊，D記者實迫佢地表態，佢地仲大機會會反對.....都係消失為妙啦......！我又唔信佢等得幾耐，一開垃圾會佢都要表態啦，如果佢棄權，咪即支持囉.......哈哈....

聲東擊西

如果你今日有睇一份報紙，就見到佢用雞?咁大隻既字講糖糖網誌，仲特登加左個插圖，有個公仔戴住我個面具打電腦。

亞明眼人話政府中人話一睇就知唔係財爺手筆，話係都寫英文云云。呢個官，真係都未起我個底，我以前係培正道返學架麻.....

其實個故仔係咁既...講真，我都係有D唔小心......你知啦，打中文可以用VOICE RECOGNITION，但SET UP 個BLOG，又真係唔係我專長.....我就呢，叫左個老友搵個細路教我用.........Whatever總之寫左幾日，居然比生果日報發現，果日星期六，仲走黎問D 內容係咪真....。 我果日都唔係OFFICE，入左場陪心福丫麻......，助理咪答佢「不予置評」囉......

但係，我都要做D野架.......唔係煲煲睇到份剪報，佢做左咁多年公務員，一睇就知「不予置評」，即係真架囉.....所以我點都要做D野.....呢D叫做Damage control，做過危機處理既一定知！

咁我咪叫間公關公司，搵D傳媒幫下手囉......仲特登叫佢寫到好似想揪出「幕後黑手」咁款，等人以為，我真係好慶，好想搵個「兇手」！

講真，如果唔係我地，叫公關公司出手，果幾粒字，駛唔駛做到咁大版呀? 人地掃把頭，搵D方法塞張相落去博出位博曝光，都係放係下面細細張，睇都睇唔到呀，你估易架。

不過呢，都係個句，點會話我係都寫英文架.....聽日真係要問下間公關公司有無睇過我個BIOS先寫架........，攪到我好似果D唔識講廣東話既三流ABC咁......！

今日真係Holiday mood......成個office 都唔係做野......算啦，我星期日都飛咯，開個World bank既conference......嘩.......D seminar 滿到......不過....連coffee break都無......

不過都好，等我可以唔再諗GST......一諗起GST，就諗起煲煲，跟住就好慶!!!! 不過，有機會問下佢地果邊點攪先........

和平有秩序的GST諮詢會

今日好得閒，雖然話下個星期有兩場諮詢會，不過我一D都唔擔心。點解? 只要你識得少少管治藝術，你就會知，根本就唔需要驚呢D咁既場合。可能你唔知，我係讀心理既，所以我再了解唔同人既心理，我靜靜雞過你幾招，等你知我點攪一場和平有秩序既GST諮詢會啦！

第一招、高質素
為左確保我地能夠理性討論，我地只請區議員同D居民團體。佢地覺得自己有面，自然唔會玩野！不過，實情係，九成以上既區議員都係雞議員(即係好渣咁解，你地唔好有邪念！)，互委會主席就更加唔使講，我見過一次，佢真係夠膽著是開胸Shirt衫加陳年底衫一件，仲踢拖上黎同我見面，十分周星星做戲咁款，幾驚佢污染個冷氣系統呀。呢D人水準有限，佢地識講果D野，我糖糖話晒都係美國畢業，點會答唔到，唯一擔心，係講講下講左英文o者！

第二招、消滅於萌芽時期
當然，呢個世界，總有D極端人，好似長毛呢D，明係劍橋畢業，佢係都要踩你場，你都吹佢唔脹，所以，為左公平同照顧參加者的安全起見，我地設立左抽籤制度。邊D會抽到入場? 梗係係我地果D情報機構聯絡主任做GST問卷話支持果D互委會主席，先至入得到啦，仲要抽埋學歷，幼稚園未畢業者優先！讀過三個學位兼做過掃街局議員者，永不超生唔使旨意入得到去講野！(佢d學位多過我，我點夠佢講喎！)

第三招、建立關係
記得笑，就算笑到好似煲煲咁 「X熟狗頭」咁款，都要笑，仲要同佢地握手，好似開演唱會咁，等果D亞叔亞嬸以為你認得佢，同埋用個手提電話影你。佢地掛住SEND相比隔離屋個陳師奶，同埋小學同學明仔示威，分分鐘仲話係見到唐季禮添呀！ 都已經唔記得係反對 GST 定係 CDMA 啦！攪掂！

第四招、理性討論
理性討論要有足夠資料，所以我會先發言40分鐘，然後輪到我助理發言，再輪到肥馬發言，再輪到佢助理發言。有咩講? 咪將本諮詢文件讀一次囉！讀完，都夠鐘啦！

佢地無問題問咯，咪即係支持囉！

答記者? 我實話聽左好多好有建設性既意見，返去會細心考慮囉！即係我助理、肥馬同佢助理講果D丫，我實岩聽格！佢敢講D我唔岩聽既野? 我一定寫到佢份APPRAISAL好好格，等佢升去幫亞煲煲囉！做得越唔好，升得越高！政府文化！佢又開心，我又開心，何樂而不為?

咁樣，跟住去果D雞議會，我就會派幫我掃地果個亞嬸去，貪同佢地溝通到丫麻。

呢幾日，林善聯上左去見亞爺，落番黎就應該會慢慢轉......我點知? 截聽囉！路遙之叫醫院個掃地亞嬸打去亞爺屋企時講既。同埋鼓油黨隔幾日又上，甜甜話，都會鬆手D，借D倚垃圾會開會就丟低等我做野喎......三個黨有二個攪掂，就會攪得掂。有亞爺真好。我咩都唔係做嫁啦，等運到！

山雨欲來

今日居然好靜，D報紙居然無乜媽煲煲，攪到我有D失落，助理話我「斯人獨憔悴」。

據聞煲煲office今日有個小型「慶祝會」，食完lunch，開左支紅酒，慶祝咩呢? 今日D報紙出得好囉！講真丫，你問我，我就覺得佢地開心得太早啦！點解? 佢無聽電台囉！D人已經開始媽緊佢卸膊啦。

佢明明係特首，收三百幾個一年，而家佢居然話：「你話我做得唔好? 我係咁架啦......你咁叻，我唔做比你做丫.....你咪做飽佢囉......！」

你知香港人真係唔係人咁笨架啦，佢地真係無聲狗咬死人架。你諗下啦，佢地交稅，請成班公務員。有左個董董之後，又請左我地，每年最少用多四、五千萬，然後攪到佢地一鑊粥咁。好啦，終於比佢地吹雞吹夠五十萬，吹到董董(最重要既，係拉埋洗手洗手洗手落黎...不過而家有D懷念佢)風濕腳痛。董董雖然顛，但佢都認認真真，香港人憎佢蠢之麻，佢至少覺得八萬五真係得，佢真係去做，而且超額完成喎。

但你煲煲居然爛仔咁款：「你咁叻，你做囉......」......佢真係未死過。

香港人覺得自己係老闆，負責交稅。而家香港人會覺得咩呢? 一定係：「喂，我比左好多錢架啦喎，唔夠使? 你估你係我個仔，我前世欠左你呀? 我比就唔會比架啦，你自己諗掂佢啦！」

蝦，煲煲居然同佢老細(即係香港人)發爛渣.....你估香港人會點丫拿? 我估佢地會話：

炒左煲煲！

所以呢，我一路都扮死狗就係咁啦。我只係講：我地要為將來著想呀......佢地最多話我蠢同話我嚇人，唔會想炒左我。所以呢，我始終都係覺得，我比較適合做果個位......如果有得選，我覺得我都有機架，我都搵過果d好叻做民調既大學幫我做，佢話我D 市民緣都唔差， 如果有得直選，即係已經有民主啦，咁到時泛民都唔會再有賣點，我都幾大機會咁話。

今晚我特別覺得山雨欲來，煲煲果面寫手大良，好夜仲問我地拿資料，原來佢地十點出左份新聞稿，話係「回應傳媒查詢」。我都奇怪，咁夜咯，D記者仔都寫得七七八八啦，為咩要咁趕呢? 探子回報話，原來尋日亞煲煲講完之後，D記者梗係四圍卜咪啦，甜甜就話香港無結構性赤字，呢個，生果報一早講左啦，執人口水尾......我記得，果隻白鴿BB踢爆我丫麻，我記得...........白鴿仔偕偕就叫煲煲開獨立王國個夾萬，呢樣又係由侏羅紀講到而家...無新意、林善聯就為反對而反對。

煲煲居然咁夜仲要出份新聞稿。探子話份稿居然係逐點回應偕偕份新聞稿............唔通D記者係度追? 好，等我聽日早D起身睇戲先！

行歪會議刀光劍影

哈哈哈.......今日心情真係靚到......靚過我老婆呀！

你知唔知呀，今朝開行歪會議，我攪掂左 D 成員，攪到煲煲今朝被迫出黎講GST，哈哈，我就坐係度睇戲，睇下果D白鴿仔呀，鼓油黨呀，咩零售界呀，點樣跳出黎隊佢......哈哈哈！等你民望高番丫啦，我要佢下個月沉番落去同我一樣，反正我而家爛命一條！

今朝呀，傾到呢個agenda果陣，我梗係要報告下而家既情況啦。你知呀，呢劑同上次果D咩政改方案唔同，我梗唔可以話D人好支持，你估煲煲好似亞董咁懵咩，亞董唔睇報紙，佢睇架！

所以呢，我就用相反策略，講到有咁大鑊得咁大鑊。出邊果D咩政黨點反對我梗係唔使講啦，盲架咩！我講咩呢?

巴士陳同我講既，我梗係要講啦，(當然，佢話煲煲跣我果PART梗係無講啦。)其實最有影響力既，係我話比佢地知，誠哥上星期日約我打波！我同行歪議員講：

誠哥話：「碼頭就梗係無乜野啦，你越加越好添，你諗下D貨走得去邊呀，咪走深圳，你估飛得出我五指山咩！樓我又唔驚呀，你就算有，我發一發水，倒賺都唔定添，不過咁喎 ，你知啦亞Henry，富貴於我如浮雲，我都捐好多錢出去，好關心D窮人架，但係連佢地飲食都要收，就過份左D喎！即係呢，我梗係明你好難定到啦，咩叫必需品係咪，拿，我比D橋你，我間超級市場賣果D，咪就係必需品囉，橫掂，D人除左我果間超級市場，都無第二度可以買到野架啦！你轉達下啦！」

第一，佢係諴哥！第二，你知啦，果D行歪議員，個個都要表現到佢自己好多connections架麻，於是呢，人人都將佢果D富豪呀，銀行家呀，咩中間人呀，咩商會主席呀，領事呀，地產商呀，有個仲話白宮打電話黎問添呀(我心諗，有無火星人打比你問呀?)......果D故仔講晒出黎喎.......哈哈.....

跟住呢，一如我所料，煲煲都仲係堅持要推喎，但呢，為人最公道的振中哥，居然幫口喎，佢話呢，而家D人已經盛傳政府高層「貌合神離」(即係『互插、互跣』既書面語，大學生唔知咩叫書面語，姑且當係「文言文」)，佢話，要成個政府一齊推，先顯得政府真係想做好呢件事咁話，佢重建議D行歪成員，要一有機會就解釋......令人覺得現在的政府，也好像董先生一樣，政策是經過「深思熟慮」咁話。後來亞煲煲見記者果陣，用「深思熟慮」呢四個字，咪係要表現比亞振中哥睇佢幾咁尊重佢，同亞董生喎，因為亞董最鍾意呢句，連沙士死到臨頭都要「深思熟慮」！

我都未及做戲推搪，已經有人出聲和議。亞振中哥於是咪話，要由特首做起囉！

拿，即係咁，我就無同亞振中哥夾定，不過，你知啦，佢都仲想跑，所以，佢梗係宜得有機會跣下煲煲，等佢D民望插水啦！

你都唔知，果個Moment，亞煲煲塊面點止黑過包公，仲黑過亞溫總理同煤礦工人握完果成手呀，成果墨盒咁既款呀！

我就梗係客氣幾句啦，但係大勢已去，煲煲騎虎難下啦，佢咪叫自認SPIN DOCTOR既大良即刻寫稿囉。不過，唔講唔知，佢地份稿呀，真係唔夠水準，我同我D STAFF，拿住黎笑左一個上晝。聽日肯定比人插到飛起，等佢跣我丫拿！

另一樣令我好高興既，係林善聯(有D人譯做 X賤聯，或者淫X聯，我個人比較有修養，講唔出口！)今日上京，佢地係亞爺面前篤佢呀，哈哈哈.......！不過調番轉，佢地口風有D變，睇黎如果亞爺真係想推，果10票點都無走雞、假髮黨最少有四票啦，至於鼓油黨，只要我比少少甜頭佢地，可能都未必無得傾，始終係自己人麻，到時就唔會有人再理白鴿仔，因為所有政黨都會講GST有幾咁好(最好講埋我好有遠見啦！)。所以呢，如果亞爺真係想推，就實攪得掂，你話，我有咩辦法唔開心先得格！

不過，你地睇還睇呀，行歪會議D內容係保密，唔該，唔好傳出去呀！

好野我無份，咩都係煲煲搶晒

煲煲咁絕，我係咪都要發下功呢?

咩咁絕? 真係唔講你唔知。GST 呢壇野，難推都預左，但話晒，我食奶力都出埋，就算唔係同佢食左粒核彈，都係食左粒原子彈啦。但係，佢真係迫我迫到死角，無得翻身。

你聽日(係今日，我寫的時候是11:59...)就會見到報紙，政府攪左壇大野，係講十一五香港的經濟機遇。講真，呢 D 野，亞牛頭角順嫂都識講啦：咩行業都梗係香港公司拿到大陸 (唔係，係內地先係政治正確 ) D 生意好啦！咁做生意果個，就梗係最好政府將D生意送上門，幾容易講呢，我未跟亞爹學做生意果陣，都識講啦！

但係，攪咁大壇野，講經濟野，我成日係個會度，連講句 Ladies and gentlemen 都無機會，只係開完晒執野走果個咁既爛鬼記者會，就捉左我去坐係佢側邊扮佢副手，你話丫，做啦，無好報架！

老實講丫，佢又唔知自己矮喎，唔似得高達同仁仁咁，識得自嘲。佢都唔知，我坐係度都高佢一截，如果記者會同佢再坐埋D呀，高佢半個頭呀！有相為證嫁，見唔見條紅線呀?


不過佢精，叫亞佳佳坐佢側邊，映得佢無咁矮，亞佳佳留係度既功用，除左呢樣之外，都無第二樣囉！

即係咁，呢個世界，無理由所有豬頭骨都係我食格，至少都一擔沙糖一擔X 先公道丫！要我食GST呢舊X，又唔比D沙糖，點食得落呀！?

即係呢，你話一次半次都算啦，佢做左果一年多D，呢次已經係我記憶裡面第二次搶左我D野黎做......上一次係邊次? 都話係減稅咯！你都無睇我個BLOG！前面咪講過囉！

------------------------
其實，巴士陳都講得岩喎，係亞煲煲做落嫁o者，亞爺都無話要推！老老實，不過叫亞中間人，問一問亞爺，睇下佢點睇先，唔好咁笨。

不過咁，亞爺會唔會嫌我煩呢? 咁小事都要問佢..........但係唔係小固喎，等陣幾十萬人上街.....亞爺會唔會......係喎，叫亞甜甜問咪得囉，橫掂佢過幾日都去見亞爺咯.........不如叫亞甜甜開口咪仲好.......煲煲要鼓油? 除非比我宣佈唔推GST先講啦！ 我同甜甜反面? 講笑咩，佢又唔係佢細佬咁唔識撈，我同佢，做戲之麻，灑花槍！你睇唔出咩?

巴士陳比橋我喎....佢係咪同煲煲......唉..好煩

好兆頭好兆頭！今日心福好叻仔，一開鑼就跑第三！呢個馬季都應該幾好運。講開又講，佢都幫我贏左過百萬獎金，真係叻仔。

今日煲煲主持開鑼，咁吉利既日子，最好梗係唔好見到D咁既人啦，影響心情丫麻！橫掂心福第八場先跑，我咪係酒店食個TEA先囉。

入到場就見到巴士陳 (唔係巴士亞叔，唔好攪錯...)。佢心情靚到震，梗係啦，馬會主席喎！巴士陳出名係橋王，佢同亞仁仁(唔係比人爆缸果個，係鍾意聽歌劇果個)邊個好橋 D，真係好難講。由佢出手，投注額可能真係可以起死回生喎，咁政府收入又多..........咪住，政府多左收入，咁我咪仲難推 GST? 唉，失策，早知動員下，搵個無咁醒既做呢個位啦，無諗到影響咁大添！失策失策！

入到廂座，巴士陳一見到我，就好親熱咁款，雖然識佢咁多年，但老實講都無咩好深交情，咁既款，梗係有D野......不過，你知唔知佢同我講咩.......

巴士陳：嘻 Henry，咁遲呀，好忙呀? 唉，我都知你辛苦....
糖：恭喜恭喜，有能者居之........，放寬下啦，我想抽多隻馬，好難抽呀！
巴士陳：有得諗有得諗......係呢，拿，識左咁耐，係咪真係要推?
糖：我推左你個appointment咩? 我同秘書che.....
巴士陳：哈，你真識講笑，我係問，政府真係要推gst?
糖：你知啦，金融風暴果陣......
巴士陳：我知我知，不過，你知啦，我地做巴士既，好微利架乍，D 車費又雞碎咁多，你叫我點加先得格，唔通由$3.7，加到$3.88咩.......仲有呀，亞CE又好想有為，要攪最低工資，咁果 D 清潔工，掃果兩張紙巾汽水罐，仲要坐多過做，要五千蚊人工.....，你知啦，政府又唔比我加價，又加重我成本，好難做喎.....
糖：我明，不過，如果再遇金融風暴，我地都要諗.....
巴士陳：諗咩丫，你尋日有無睇西報呀，你話下次Financial Crisis重嚴重，D人咪仲想儲多個錢，仲反對銷售稅........！
糖：咁.........
巴士陳：咁咩呀，拿，你諗下，獨立王國果邊，真係多到下一代都用唔晒啦，到真係用得咁上下，政府要開稅，你驚到時香港人唔支持咩。亞爺又無話唔做唔得，你使乜自己食左個原子彈咁笨先得格..........而家亞煲煲跣緊你呀，你估佢淨係要民望咁簡單呀? 佢要建立個皇朝呀，要你下一屆都無得做呀，不過佢想邊個接就唔知啦，應該唔係仁仁既，佢鍾意聽歌劇多過鍾意返工！可能係鬍鬚仔嫁........拿，你諗諗啦，我要招呼客人啦，搵日食lunch啦
糖：.................................................你D料....
巴士陳：堅過石堅！


我而家都好唔明，佢做咩要咁幫我呢? 可能係我個人好人卦，亞娘成人都咁讚我既！但係，佢講既，有幾多成真呢? 老老實實，我都唔敢肯定。煲煲跣我我都預左嫁啦，唔通我真係去開獨立王國個夾萬? 果度都有幾千億，但唔輪到我攪固喎，莫講話佢係煲煲個馬房，等陣攪到港元比Soros衝擊，我就死都唔掂喎..........巴士陳究竟係想幫忙，定係同煲煲夾埋......話晒佢地都係公務員出身......唉.......好煩.....

點算...亞娘都反對

慘啦慘啦，點算呀....我自問都好比心機做尋日個presentation 格，點解今日張張報紙都話我嚇人嫁? 有咩理由連友好傳媒，都話我無數據先得格.....豈有此理，我下次briefing 一定唔會再搵佢，呢 D 叫做，敬酒唔飲...佢見到賣盤報既下場，都重唔識做，第日搵個總編輯上電台伸冤都唔會有用......(不過如果佢搵亞爺同我傾計，就梗係唔同處理啦，因為我至少可以再摸下酒杯底，睇下仲有無得跑....你都唔怪得我固喎，呢D咪係政治囉)

不過而家可以點呢? 今日星期六，唔通我又開記者會澄清? 次次講完野都要澄清，攪到我好似唔識講廣東話咁，形象唔好喎......況且，政府實施五天工作，我班o靚等陣又比面色我睇，話早知去跟亞 D9 唔使做咁多野，佢話佢同期的AO，日日在OFFICE睇 YOU TUBE，都唔知幾得閒咁話喎！咩係 YOU TUBE? 咪即係巴士亞叔囉...不過，駛唔駛日日都睇呀....又唔係靚仔

不過，睇睇下D報紙，有D人既態度好似轉緊......係咪其實呢兩個禮拜 D 工作都好成功呢?

糖：唉亞娘...今日無打牌咩?
娘：落大雨呀，我姊妹話落雨唔旺佢咁話，唔肯黎。又煩緊咩呀?
糖：亞娘，D報紙蝦我呀！
娘：點蝦你呀，講個黎聽！人地咁大份報紙，做乜要蝦你先得格? 同埋，除非佢地夾埋o者，如果唔係，有人蝦你，實有人幫你格！你睇果時果份西周刊登左一張相蝦個女星，好快就執左笠，而家仲比人蝦番轉頭，自己個女星比人影、比人登啦....，呢D咪係報應囉。不過，一本色情咁樣影人地細路女，都係遲早有報應嫁啦。
糖：亞娘，佢都唔細路女啦，如果舊時好命既話，兒女一大堆啦！
娘：係咩，咁老嫁拿.....咁即使報紙點蝦你呀?
糖：我前晚做左成晚果張「意粉chart」，居然一張報紙都唔登，浪費晒我 D 心血！亞娘，你知啦，捱夜好傷身家麻......。
娘：我睇過你個圖，不過，好唔PROFESSIONAL喎....連標題都無......
糖：我趕唔切做麻....最衰都係個「計數處」，先前比張咁差既圖我...仲有，我明明引左一堆數字，D報紙死都話我無數據......唔係自相矛盾咩...
娘：咁又係，不過，佢地先入為主都無辦法。你要幫佢地諗下先得格！而家一張報紙6蚊，第日就賣$6.3，咁佢點收? 一係收$6.5囉......但係而家D報紙質素咁差，亞娘都唔睇咯，仲加價，邊個買先? 咁佢要自已比果5%嫁啦，佢梗係死都反對啦。
糖：咁係咪其實都唔會做得到?
娘：都好難囉....你亞娘我都反對....第日買手袋要比多5%喎，你知亞娘買親手袋都5位數字，你抽果D稅，夠我飲餐茶喎......仲有.....(下刪五十個例子)
糖：................死煲煲.....又話我做掂左可以名留青史.......仲話佢做完可以比我做.....激死我啦.....
娘：咁你又唔使咁激氣，食碗燕窩先啦，趁而家你未抽稅..........平一截嫁！

意粉Chart

我今日發明左個term：意粉chart，泛指政府愛黎嚇人，但人地又睇極都唔明 (其實係睇極都唔明點解會錯成咁) 的數據、資料、理由、歪理等。167萬? 落後啦，你知啦，我要好形象化家麻.....

至於點解叫意粉而唔係米粉、涼粉或者洗衣粉，則唔重要，個原因，係因為我尋晚食意粉O者，你地又唔駛咁認真。

不過，你知唔知，其實果個係我成晚O既心血黎嫁啦！

初初亞助理將「計數處」做的版本給我看，我差D暈低，(真係食多多止暈丸都唔掂！)，佢居然將我要的數字，由1970年plot起，係人見到都唔覺得要收 GST 啦，唉，過去幾十年，香港得一個經濟衰退之麻，咪就係亞董在位果八年囉，我肯定，連 D 岩岩出黎行的記者仔，都會問：「咁係咪即係話，係香港，一個經濟週期係35年? 我地而家要開 GST，係為?35年之後果個經濟衰退?」咁你叫我點答? 唉，公務員即係公務員！如果我間靈芝店有 D 咁職員，晨早就炒左啦，但公務員仲可以?長糧......

所以，heehee，我做左 D 手腳，令到D 曲線疊埋一齊，波幅仲鬼咁大.....仲唔嚇死 D 人?我點識做，heehee，你識買本「別讓統計圖表唬弄你」，咪得囉！

不過就係因為咁，所以根本趕唔切加番個標題上去.....不過算啦！

我諗，聽日 D 反應都應該幾好既，至少，會多左D無知婦孺支持！

政黨低水平 (不過政府都咁低)

都話政黨低水平，今日係份西報，有個唔知係唔係政黨，而又成日扮到自己係一個西婦o既首領寫左篇文(不過話時話，佢老公真係一個鬼佬....鬼佬個老婆，簡稱鬼婆)，話應該將地租加到10%、20%甚至30%，唉....連我都不如 (我既意思，即係呢，我而家做個爛鬼FS，無兵司令....)，仲話民主喎，你真係驚唔驚?

我都話，要擴闊稅基咯，加地租，咪盞令個稅基仲窄，仲要攪到D租貴晒......等陣亞漁農界代表又話佢D選民網到好多魚都唔夠交租，到時唔通叫我教佢釣魚咩！我估佢都唔知有咩居心，唔通同亞煲煲(well, 我都係鍾意疊字...)串通，跣我?

唉，而家都唔知邊個先至信得過......。

仲有，今日好似好黑咁，成個勢都唔順，除左唔知點解會安排左去探單親家庭，我都無機會講GST，攪黎做咩? 唔通我同佢地講：「你地唔使驚，我一定會加番D綜援比你地，有GST，你地都唔會餓親架 (肚餓咪食燕窩囉，亞娘好少食飯，佢餐餐都食...)...」，你估我有無咁蠢丫拿?

咁都唔止，呢個咁既保安局，今日走出黎話開放禁區......有四分一個香港島咁大......唉，多左咁多地可以賣，你叫我點推GST先得格? 點解係都要今日講o者，等多幾個月會死咩！又係煲煲跣我?

豈有此理....

糖：順嬸，拿工具俾我...
順嬸：亞少爺，你而家做呀? 唔岩時晨喎......
糖：我而家好慶呀.....我要而家做呀..........
順嬸：好啦好啦.....

糖：打你個死人頭，打到你有氣無地走、打你對死人手，打到你有手等於無手、打你把死人口，但到你有口都無氣?................(下刪十五分鐘對白)

順嬸：亞少爺，我好少見你咁激動固喎，今次呢個....好似係邊度見過喎.....佢咪係....曾....
糖：順嬸......
順嬸：係係係，我唔睇得...
糖：唉，順嬸，我順番晒啦.....收野啦。

我終於明白咩叫「有壓力、有壓力、未解決、未解決......」哈哈哈...................!!!!!!!!

我都唔明，我以為果D咁既叫政黨又唔似政黨既，都話coordinate唔到o者，但政府係咪應該coordinate得好D呀? 咁叫我點推呀，淨係救火都唔掂.......好彩，肥馬去左越南，希望佢唔好亂講野......

仲有，最黑既，就係果個咁既Warrick Smith(佢係鬼佬睇唔明，唔驚...heehee)，居然話有GST會令係香港營商既容易程度「有負面影響」，咁我尋日寫好果篇文，點可以用? 唉，要開始寫過........

天助我也

嘻嘻，真係值得飲番杯....你知唔知點解丫? 因為又有好消息，有利我推GST，哈哈，真係天助我也！

今日又有D咩全球排名公佈，香港便利營商全球排第五，升左一級！咁仲不特止，最重要既，係前面果四個，係新加坡、新西蘭、美國和加拿大。

有咩特別? 咁都睇唔到? 咪係全部都有GST囉！心血來潮，下星期去論壇，咪可以用最新數據，篇keynote 我都寫好架啦！(費事比假髮黨話我無新意同新資料佢地研究，不過都唔明，研究咁耐都唔肯支持，都唔知想點)

「根據國際具公信力的機構調查顯示，無GST影響香港的營商便利程度，令香港今年只拿到第五。根據國際機構建議，以香港的實力，一實施GST，營商便利程度，一定跳升為第一。」

「香港乜都拿慣了第一，過去幾年，跌左少少WATT，我地要急起直追，超英趕美超曼克頓，所以為左香港人的面子、為左我地偉大祖國同埋十三億人民的面子、為左我地偉大的我毛澤東思想、鄧小平理論同江澤民主席的三個代表論、為左馬克思同恩格斯............」

「香港唔單止要立即引入銷售稅，仲要拿世界第一。據政府的研究顯示，現時全球銷售稅率最高的地方是北歐的25%，我地認為，銷售稅稅率應定為30%，以便在未來十年，香港的銷售稅率和稅收領先全球100個國家，奠定香港事事第一的地位。根據我既了解，現時香港已取得講電話廢話最多第一名、雜誌封面平均見肉率最高地區第一名、平均外遊次數最多第一名、發達國家中貧富懸殊最嚴重第一名，還有，人均儲備最高而仍要以開徵新稅的方法增加收入因而獲政府無良程度第一.....」

「若果我們在不久的將來，成功成為全球銷售稅率最高的地方，相信香港又邁進一步，成為全球最少人想居住的城市的第一名，成功實現與國際脫軌的長遠目標！」

「所以，銷售稅對香港長遠的前途有好大影響，請大家係諮詢期結束前，盡早投下你信任的一票，多謝！」

成篇都咁好，咁有感染力，台下既聽眾一定早已熱淚盈眶、高舉我國國旗、揮舞著諮詢文件、一齊高喊「銷售稅萬稅萬稅萬萬歲」，因為我地中國人民終於站起來，實現了...............well...好似長左D喎，但，CUT邊部份先o岩呢? 定係長左少少都唔怕呢? 但我仲有好多野講喎，都未講殖民地政府幾十年黎都唔引入銷售稅，拖左香港的後腿咁耐.....咁點算呢? 等我聽日問下亞娘先......

傳媒公關收效

翻看呢排收到的 GST 意見書，有好些都話同意香港稅基窄。好囉，可以用黎開記者會時講。WELL，算我聰明，如果唔係我Check到無預錢做傳媒公關呢part，好可能重係度捱打。好彩我臨時出tender，搵左間公司同我做。

點做，好簡單o者，佢地D酬金，同傳媒度見到的支持意見成正比！所以呢，你近日見到D咩讀者來函呀、論壇呀，唔多唔少都有幾篇支持稿。

講真，咁根本係一家便宜兩家著。點解? 唉，我發覺我真係聰明好多，絕對係不可多得o既政治人才.......即係呢，你諗下你睇報紙，篇篇都話反對，咁做編輯既，梗係要搵D贊成的，來平衡下，尤其係友好傳媒，點都要兩邊都報下。但個問題係，支持果D，而家點都唔係申個頭出去......便總要有D開路先鋒！那些公關公司，便是最好的開路先鋒！

佢地一定支持銷售稅啦，唔係我唔比錢......所以我絕無迫佢地嫁，咁對果D想講贊成意見的人又好，有人開了路丫麻....對報紙編輯又好，對我同D公關公司，就更加唔使講啦.....。

-------------------------------------

不過，聰明o既上司，一定要有聰明o既下屬......唉，你地知唔知，我今朝睇報紙，見到肥馬尋日居然話「諮詢期長證明有誠意」，我真係比佢激死。

政府大多數諮詢文件的諮詢期，都係得果兩三個月，咁咪即係無誠意諮詢果D? 仲有，等陣白鴿仔同甜甜唔叫我縮短諮詢期，叫我延長到五年零九個月，以顯示誠意咁點算? 我答應好唔答應好呢? 真係蠢到加零一！

淨係得把口，真係激死我.....冷靜D冷靜D...咁激氣死好多細胞，同埋會多好多皺紋.........冷靜D...........

蠢人自打嘴巴

D 人成日都話要咩「公民社會」，我都唔知有咩用。好似今日報紙話有個團體調查話咩「七成青年人反對開徵銷售稅」，青年人又做一餐，推要廣之，可以再做「八成牛頭角師奶反對銷售稅」、「九成半長者反對銷售稅」，或者「三成半幼兒園學童反對銷售稅」(因為另外三成半睏緊覺，三成係度發呆唔計)，又或者「100%高達反對銷售稅」，以及「100%財爺支持」......咁又有咩意思呢? 難怪我 D 老友唔鍾意呢班人......。

今日見唔到亞 CE，好似話佢要見白鴿黨，但據天氣報告講，今日亞 CE 心情唔多靚。上個禮拜，亞娘話我咁問亞 CE，會令佢好難做，係缺乏政治智慧所為。唉，我都唔明點為之有政治智慧，係咪即係唔好講錯野啦? 亞振中哥夠唔講野啦，實唔會講錯野啦，又唔見佢有得做，我至少仲跑緊呀......

BTW, 亞娘都講得o岩，亞 CE 千辛萬苦、受盡屈辱先坐到呢個位，而且猛比蕉皮我踩，都係為左連任，我居然叫佢讓位，仲要比番叫佢掃街果個......亞娘真係叻，如果我做到，都應該事事問亞娘..慈禧太后? 點會呢，我亞娘食咁多燕窩，靚過佢好多.......睇黎我暫時都係唔好攪亞 CE 住啦，等佢下左啖氣先啦，唔係等陣佢對住我噴火就無謂啦。

星期六，本來想搵亞誠哥打波，但助理催稿──「財爺為你評析」──當然唔係我寫啦，佢催我睇。D 人成日都話GST會攪到政府好大駛.....其實唔係D人，係得一個千古罪人，返黎賣書賺香港人錢仲唔夠，仲多多意見，干預我國內政......所以我一定要解釋，政府唔會揮霍。老實講，亞爺專人睇實盤數，睇得仲實過垃圾會，點會揮霍到呀。當然，凡事有例外，女髮局呀呢D有直線上去，就好唔同。

不過，我梗係唔可以係報紙度寫亞爺睇實啦。我叫D助理諗D理由，出黎效果都好似麻麻地......佢地話「基本法」有規定，算佢寫得婉轉啦，「基本法」咪即係亞爺囉。不過，另一個point就難攪 D，話「無意背?一貫『應用則用，應?則?』的審慎?財原則」。老實講，唔好話我呀，亞CE 做財爺果陣呀，明係見到經濟差緊，都係咁駛，又猛減稅，當時我做商會亞頭已經覺得唔妥，所以佢話開gst，我一口就話唔得，唔會亂咁駛，講都冇人信啦........不過，屁股指揮腦袋，我而家梗係要話唔會啦。如果我做唔到果個位，就咩都唔關我事啦，如果我做到，亂駛錢果個都係到時的FS，又唔係我，所以點都唔關我事，heehee......!!!

仲有，話公共開支嚴控於百分之二十，咁咪即係自己穿自已煲：唔可以加開支，咁我點說服「SOCO何」我們加醫療扶貧先得格? 唉，到截稿前十五分鐘先比我，唔通寫過咩.....都唔識轉膊......，下次都係自己落筆，我寫完英文叫佢地譯無咁嬲！希望「為反對而反對」果班，唔會發現啦，無咁醒卦?

絕世好橋

唉.....已經成點鐘，而家先返到屋企...

尋日...其實應該係前日先o岩，中華廠商會攪左個論論，D o靚返黎報料：群情洶湧也。

大件事！仲諗住做生意多數係有錢人，支持度點都會高D，都攪成咁。咁又係，比我做佢地我都反對啦，無成本既野，反左先算啦...所以無辦法都衰左...被果份可惡既生果報踢爆，不過，惡人自有惡報...影人丫拿！

我唔明既，係我已經照足新加坡果套黎做，佢減稅，我減稅，佢話為擴闊稅基支持出口，我就刪左後面果句，佢話人口老化我又話人口老化，但佢推得咁成功，點解係香港唔WORK嫁呢?佢仲要好野到連續兩年加銷售稅都得......。

正當我今日係度自言自語果陣，助理入黎聽到，佢搭訕話：因為香港個立法會，唔似得新加坡個國會咁得兩個人係反對黨，永遠都唔會輸.....仲有，新加坡唔准遊行示威，香港准，點同呢！

唉....咁有咩計?

其實，如果豉油黨唔出聲，其實已經好好多...班假髮黨其實暗啞底都唔知幾支持，至於剩番果個，亞爺自然會發功。

如果我地偉大的祖國的法例可以係香港用就好啦，至少將成班白鴿仔收入秦城監獄，泄露國家機密，睇佢地仲夠唔夠膽話我造數、仲夠唔夠膽話比香港人知政府好多錢，同埋有好多辦法搵錢。

唔通嚇班muggles，再嘈香港唔准示威咩，佢地連廿三條都唔驚咯.....唔通......呀，我諗到啦.....咁咪得囉..........我真係聰明........打個電話比亞CE先...

糖：亞 CE，你未睏呀? 你咪好想推 GST既，但你見啦，出面嘈得咁緊要，好難攪喎，等陣攪左壇廿三條翻版就無謂啦，係香港，翻版係犯法架...
煲：你又遊花園遊左去邊呀?
糖：我意思係，我諗到條絕橋推GST。據說亞爺好擔心我地再有赤字，你知啦，自由行都就黎放晒，旅發局又會問我比錢，香港會再有赤字，阻住亞爺統一台灣.....
煲：喂喂喂，入正題呀，我聽日約左公文袋，仲要準備下呀！
糖：公文袋? 點解唔係 X孕....
煲：你講左去邊呀，入正題呀！
糖：好好好......我意思係，班muggles減稅攪唔掂，加福利又唔得，我諗我地應該換個個方向，我諗到條絕橋，但要你幫手?
煲：如果行得通，我一定做，你唔見我已經好落力咁同你一齊推緊咩?
糖：咁既，你只要係 C 政報告度宣佈，除非市民支持銷售稅，否則，你會提請中央，重新邀請老董出黎做特首，你知啦，七一五十萬人都係因為......

BOOM~~~@#%#@^$#&@%

~~~~~~~~權權~~~你做咩呀? 做咩講講下電話睏係地呀? 醒下啦！來人呀~~~~~~~~~

糖(自言自語)：佢真係好眼睏喎......，咁，聽日先再講啦！但真係好橋喎......不如上房同亞娘傾下，亞娘成日都會有D 好橋

貓哭老鼠

據說「煲呔」見政協果陣，力撐 GST，今朝我睇報紙，只係覺得貓哭老鼠，一面扮到好似同我一齊推銷，一面又使橫手，想叫停我，我估都係果兩個係外面請番黎的打手幫佢諗的橋，等佢 D民望唔好跌得咁勁。

不過，我點都捱多兩個月，等佢公佈完 C政報告先再諗。

佢都算毒，之前我明明諗住減稅，等我新年果陣仲開晒口，祝 D市民心想事成，點知臨印書先截住我，點都唔比我減稅。D「o靚」因為咁，要重新做過盆數，攪到好似冇乜錢，做左好多晚通宵詐晒我型都唔在講，最慘好衰唔衰，截唔住稅局單案，仲比佢贏左官司收多N咁多億，攪到我公佈果條數，同actual figure 差好遠，仲要衰到比白鴿仔發現，猛咁鬧我做數......果排真係好似行衰運咁。

而家我點都要同煲呔玩番夠本，除非佢夠膽係本 C政報告又減稅又唔開銷售稅，否則佢點都講唔通話減稅，個采梗係留番我自己出年三月臨尾?番啦。

我諗我個人都唔乞人憎，D AO都唔驚被BLACKLIST，好似都幾肯撐我，肥馬都算係咁，大熱天時都去油尖旺講下GST。佢口甜舌滑，呢 D野，都係留番比佢做！

白鴿BB

尋晚收到風，友好傳媒話白鴿黨又講銷售稅，不過見TVA無報，應該無料到。

今朝，助理一早話我知尋日好靜，淨係得班白鴿BB懶係大張旗鼓，話多?好多人反對GST咁話喎。

自從白鴿黨唔再係大黨，就變成白鴿仔，所以今次呢單野，我都係叫「馬九十」去應付佢?。不過，據說班白鴿仔都放晒假，剩番班白鴿BB?香港，結果得果幾個人遊行 (警察話218人?)，但佢地又係既，做低人地條數，都無理由咁做，邊有數到218人咁準，行出行入都計唔到啦！話說回來，班白鴿BB又跳海，又踢波，報紙暑假無新聞，就放張鬼迷咁大既相填海，又難怪D中產都信佢?。

不過班白鴿BB就算跳樓都唔係問題，最慘就係「剛剛」，尋日重話我「變?」。梗係變?啦，比你楂住盤數你都變啦。雖然我自己都係功能組別出身，但呢家?真係好難攪，尤其零售界，個個接手都攪到我一鑊粥...有機會呢......

但講真果句，如果可以唔使做GST呢壇?，我都真係唔想做，攪到我D民望插水。最衰都係「煲呔」，係都要我做，好彩你精我都唔笨，做足九個月，到時你仲推得甩? 呢幾日難免令我有D興奮既，係呢壇?居然有個附帶作用，就係令到「煲呔」D民望，都同我一齊跌，仲係歷史新低添。所以呢，我呢輪點都要做多D野，D muggles越唔鍾意，我就越要推，等亞煲呔見到D民望跌到新低，頂唔住?求我鳴金收兵，我再同佢開條件都未遲......heehee，等你第日仲敢比蕉皮我踩丫?！


註: muggle 者，不懂魔法之人也，有少少「普通人」的意思，出自Harry Potter，我D仔女好鍾意睇，已經睇完六本 (當然係英本版啦)，呢個字都係佢地教我。

甜甜帶來的煩惱

唉，甜甜 (佢不嬲叫「田田」，但好似唔係幾好聽，所以都係叫「甜甜」好D)呢輪都唔知做咩，好似同我過唔去咁。不嬲都好少人示威鬧我，但甜甜居然帶幾千人示威，話咩「銷售稅 一定衰」......點會呢?

香港人真難服待。果班白鴿仔，成日同我地講全球有百幾個國家有競爭法，所以香港應該有。全世界夠百幾個國家有銷售稅，人地行得通，我引入，佢地又唔同意，真係輸打贏要。

有時我真係唔明甜甜點攪，我同D商會摸杯底，佢地都好支持，但風頭火勢，又放緊暑假，D人都唔係公司，真係無乜邊個敢出黎撐。希望快D放完暑假，搵日再請班CEO開番支 Chateau la Fleur。唉......