咩咁絕? 真係唔講你唔知。GST 呢壇野，難推都預左，但話晒，我食奶力都出埋，就算唔係同佢食左粒核彈，都係食左粒原子彈啦。但係，佢真係迫我迫到死角，無得翻身。
你聽日(係今日，我寫的時候是11:59...)就會見到報紙，政府攪左壇大野，係講十一五香港的經濟機遇。講真，呢 D 野，亞牛頭角順嫂都識講啦：咩行業都梗係香港公司拿到大陸 (唔係，係內地先係政治正確 ) D 生意好啦！咁做生意果個，就梗係最好政府將D生意送上門，幾容易講呢，我未跟亞爹學做生意果陣，都識講啦！
但係，攪咁大壇野，講經濟野，我成日係個會度，連講句 Ladies and gentlemen 都無機會，只係開完晒執野走果個咁既爛鬼記者會，就捉左我去坐係佢側邊扮佢副手，你話丫，做啦，無好報架！
老實講丫，佢又唔知自己矮喎，唔似得高達同仁仁咁，識得自嘲。佢都唔知，我坐係度都高佢一截，如果記者會同佢再坐埋D呀，高佢半個頭呀！有相為證嫁，見唔見條紅線呀?
不過佢精，叫亞佳佳坐佢側邊，映得佢無咁矮，亞佳佳留係度既功用，除左呢樣之外，都無第二樣囉！
即係咁，呢個世界，無理由所有豬頭骨都係我食格，至少都一擔沙糖一擔X 先公道丫！要我食GST呢舊X，又唔比D沙糖，點食得落呀！?
即係呢，你話一次半次都算啦，佢做左果一年多D，呢次已經係我記憶裡面第二次搶左我D野黎做......上一次係邊次? 都話係減稅咯！你都無睇我個BLOG！前面咪講過囉！
------------------------
其實，巴士陳都講得岩喎，係亞煲煲做落嫁o者，亞爺都無話要推！老老實，不過叫亞中間人，問一問亞爺，睇下佢點睇先，唔好咁笨。
不過咁，亞爺會唔會嫌我煩呢? 咁小事都要問佢..........但係唔係小固喎，等陣幾十萬人上街.....亞爺會唔會......係喎，叫亞甜甜問咪得囉，橫掂佢過幾日都去見亞爺咯.........不如叫亞甜甜開口咪仲好.......煲煲要鼓油? 除非比我宣佈唔推GST先講啦！ 我同甜甜反面? 講笑咩，佢又唔係佢細佬咁唔識撈，我同佢，做戲之麻，灑花槍！你睇唔出咩?
3 則留言:
其實點解唔試下將d complicated ge policy simplified佢? 咁一黎好多野都好辦d, 2黎會少左機會俾人sip位+搶風頭...
同埋其實商品消售稅對大眾未必好...貧者可能會因為d野貴左, expenditure又多左, 變得愈貧...正所謂"貧者愈貧, 富者愈富"...其實不如嘗試下o係一d對身體有嚴重傷害ge消售品上面再+一筆tax, eg.tobacco, wine...etc..
另外, 想講多一樣野就係希望容許綜緩人士每月返工, 直至總資產多於法定條款, 就要脫離綜緩網, 正式投身社會, 我覺得會令更多有需要的人受惠...可能呢樣野未必係同你mention, 不過我覺得如果咁做法, 對香港整個經濟體系係有一定ge幫助...
Anonymous你好，多謝你做左第一個comment呢個site既朋友。
即係呢，我一定要解釋下，雖然有銷售稅，但係，窮人都會有補貼，我地諗緊架啦，只要佢地認係窮人，我地就會比津貼。不過，如果佢唔認，我梗係唔比呀。
仲有，因為我地要「擴闊稅基」，即係係人都要比稅，所以煙同酒呢D，唔係人人都飲、人人都食，擴闊唔到稅基我地唔會考慮。同埋，加酒稅，我自己咪要比多好多錢? 點可以呢！
至於你話綜援問題，佢地而家都可以做野，只要收入唔多過指定數目就可以繼續拿綜援，就係為左想鼓勵D人做野。
呢期特區政府矮人當道，所以振中、章章同糖糖你三位老哥都無運行，一日John曾上位，大家就有機會鬥．．．．．．．．．．．．．．高！
發佈留言