後會有期

各位有看過糖糖網誌的網友：

多謝你地一直支持，我絕無估到，最近仲有人問我去左邊......。當初開始寫這個網誌的時候，也沒有想過吸引到幾份報章報導，只是想從一個小市民的角度，去理解為什麼政府大把盈餘，還要開徵銷售稅咁不可思議！

我本人對糖糖無咩惡意，並不討厭他，只是「適逢其會」佢剛剛做財爺，才找他做主角咁解。現在看來，銷售稅似乎在三五年內也無得翻身......對香港是好事。這更令我覺得，香港人一定要努力走出來講自己要咩同埋唔要咩。政府係一個好怕事的政府，凡事唔駛講道理，佢而家，已經唔會聽道理，係聽夠唔夠大聲，邊個夠大聲，邊個話事！

最近，個市都係度講緊普選，果班好討厭的假左仔，又跳出黎話2012又無普選......我相信，再過多五年，佢地一定都係話2017, 2022, 2027......都唔可以有普選，令人極為厭惡。如果我地唔出聲，我相信到我地個孫個代，都唔會有普選。

舊年開始寫糖糖網誌時，其實相信辛苦，因為我日間要返工，很多時回家已經差不多半夜，才開始想有什麼可以寫，有靈感都要寫到一、兩點......，無靈感就更得寫得唔好，但有咁多人睇同回應，我已經好滿足。我不會再更新這個網誌..................除非糖糖去選特首啦！可能會再set up第二個，講香港政治、政策 and whatever。

多謝各位，後會有期。

糖糖

我都話，煲煲唔會放過我架啦......

份野，過唔到呀！點解?你睇住我個blog咁耐，都仲未知呀?

即係咁，老實講，我就唔會「識做」架啦，所以我份野，無減稅架！

死煲煲，叫亞baby做雷鋒！佢一揭，就揭去salaries tax果版，睇都未睇，就話！"This is far from votable. I totally understand, Henry, you know, I am there...sometimes..., it is not good for the government in the long run that we follow what the opposition asks for! It will make us fools. Of course, I don't support cutting tax as well. But the problem is that, in the long run, we're all dead. Just view it from another angle. If we don't cut part of the salaries tax, I bet the opposition will just vote it down. This is not wise politically. I personally don't like to support that publicly."

車，玩野呀！又話集體負責制? 而家淨係講集體回憶唔講集體負責制.....你唔出黎講，咁做咩仲做行歪議員喎！

咁仲未夠喎.......果個咁既大花筒.....話晒我都係你前黨友丫......

「亞Henry，老實講，我都好同情你，有時係立法會，佢地班人叫果d價，我都覺得頂唔住架.....但係，你知啦。果班反對派，而家有d分裂，白鴿黨想減稅，佢地班左仔就無論如何都會反對你架啦，公文袋，你話啦，木獨梁又要選，佢都要出位格，加埋個左仔湯湯，佢地多數都會反對，就算我地同林善聯支持，都攪唔掂！如果呢份野唔減D稅，你迫到白鴿黨要反對，大家都無運行.....況且，你知啦，我地出街都叫減，你唔減，我地都好難做，我最多行出去唔投票架咋....你都好難會拿到我果票架啦............你信我啦，邊都要咬住隻白鴿......」

仲敢同我講，前年比左五億你，養住個仲大花筒個你既o靚，...........你仲要駛錢駛到駛唔晒，結果要發花紅、送D職員去老鼠公園.................結果比白鴿黨咬住我地唔放，而家教我治白鴿? 有無攪錯?

仲有，個問題係，我點解要就住班白鴿喎！

個工會仔就加把口.....「喎都係簡話！」車，你有票咩.....學好D廣東話先啦。

...............

煲煲終於發功啦.......「你地唔好比壓力亞Henry啦......」(講到我好似受唔到壓力咁)
「......我都做過呢個位...........」(好似唔知咁)
「...............係好難做既........」(係喎，你做果年有八百億剩，仲有四千億係庫房喎，有幾難做呀?)
「...係人都想你派糖...........」(包括你丫麻!)
「...............派得多派得少，都係比人鬧......」(係呀，差D唔記得，果年你派少左二千萬比我個SECTOR，今次我一定要連本帶利收番！)
「...計我話，最好唔派....」(你話架，睇下你支持得幾多秒)
「...............不過..」(拿，兩秒)
「.........總理叫我地要『頭腦清醒』」(叫你咋，無我份喎)
「......同埋...總理叫我，一定要減稅喎！」(嘩，咁都得? 死太監！)


「等陣，Mr. Tsang，除左你同鬍鬚仔有份......」我點都唔會放過佢...

「就咁決定啦，亞Henry，我地下星期再睇多個version，就finalize啦。散會！」

...........................................................................!

&^%#@&^%$&^@＊&%%$#^$@&#^(@&)(!)#&@&%%#$!#@%$!＊!)#@

寫完！

下個星期，我就要將份筆真送去行歪會議..........咩話，你未比意見我? 拿，唔關我事喎，今年過完年就要讀咯，肥馬舊年都話左比你聽啦，我地份野，千幾頁，淨係將份稿，分番開，都要一個禮拜啦，send番落咁多個部門對稿，又要多一個禮拜啦！咁行歪會議果班人，實有野要改，咁我改都要改一個禮拜啦，咁都攪三個禮拜....................whatever，總之，我最多聽埋今個禮拜官台個forum..........你未講，你既事喎！

老實講，我都知煲煲已經馬定晒佢個馬房D人，準備射我。我都知，佢一定迫我減稅......其實，佢已經出左聲。今個禮拜開行歪會議，佢已經係度暗示，話，「糖糖，你真係得既！大陸收番香港咁耐，都好似未試過十一月就只係得36億赤字，可能你未跟過夏鼎基啦，反而仲無包袱」，咁話。

死煲煲，咁即係咩意思先? 話我好運? 我心諗，你理得我丫，同埋，又唔見當初你夠膽叫亞鬍鬚仔做呢個位? 係呀，我係唔識呀，但係我做過生意，識睇個勢丫！果時沙士衰到咁，如果唔起番，香港唔陸沉都暴動啦，都唔避得去邊啦。

係，我梗係知，煲煲實要班行歪會議迫我減稅，但係，我一定唔會自動投案，佢唔做到出面，向D傳媒放風，等D市民都知，我已出黎宣佈......點解? 拿，做政治呢，要知咩係「小罵大幫忙」！等D垃圾會議員媽我，我咪隱隱晦晦暗示係比煲煲迫囉！睇下到時邊個死丫拿！

拿，你地下個禮拜，記得睇電視啦，點解? 因為下個禮拜，煲煲去垃圾會Q&A，班人仲唔如狼係虎咁趙佢咩！哈哈哈！

我仲欠四百億埋唔到單！

D報紙真係離譜，我根本從來無講過要減稅，但係D報紙已經講到似層層咁。

查實，唔係我保守，我都唔係咩「守財奴」，你話丫，我買咁多酒，根本唔係算死草..........我根本就唔夠錢用，因為煲煲都無開始拉票，我點知要減咩稅先得格?

我話事? 我都想丫！你諗下，煲煲就黎要開始拿提名，佢岩岩上完去見亞爺，點解落到黎都咁靜先得丫? 你唔知哩，佢日日呢埋係禮賓府，就係打電話......，打比果D誠誠呀，彤彤，湘湘呀咁。你知啦，做DEAL都要一手交錢，一手交貨啦，你要人挺你喎(唔係頂你.....)，你估個個都好似東東咁有義氣，一句「我挺董」咩！果D運作，我都識啦：

煲煲：契爺，今日打左波未呀?
誠誠：呵呵呵，總理有咩口訊帶比我呀?叫我頭腦清醒呀?
煲煲：契爺，連你都玩我................係呢，個孫仔牙牙學語啦，識叫爺爺未呀? 我都想抱孫呀.....
誠誠：而家，呢D野，都好難求囉，你知啦，我都唔意在囉.....你好忙啦......
煲煲：係呀，唉，我就無亞董咁好彩啦，佢就無人同佢選，你知果個咁既大律師.........贏唔到，點可能..........但係煩住晒囉，錢都要駛多D啦。
誠誠：咁你又唔駛擔心.......
煲煲：唔係呀契爺，我攪得掂架啦.........
誠誠：明架啦。我叫慈善基金做張信託咪得囉......不過，我做埋今次架咋，見你做得野，我都唔志在囉，淨係想退休嘆下世界之麻........係呢，我果日，同D孫去完老鼠籠，順便去大嶼山，我都好多年無去啦.........丫，原來大嶼山同我後生果陣差唔多。你話如果起得五十層，望去南中國海....真係....死而無憾囉....
煲煲：..........................好.............好..主意......呀契.........契 爺...

你話呀，八百個，佢點都要打晒電話啩！平均一個要一億，都無左八百億啦！何況一幅地點止一億先得架！

拿，我今年，得四百億，咁我要嘔番八百億出黎，仲爭四百億，我邊度搵四百億番黎? 所以我要開GST，諗住兩年可以冚番條數..............而家睇個勢，要加稅添呀！

裝修！

因為我預計出年會赤字，所以，裝修過個BLOG，用紅色！姣婆紅，因為，亞娘鍾意！

有辦法！

章章今日提醒我！佢話要加二億比果間新既私立大學，老實講，而家八間大學都咁渣，收唔到好學生，仲加多間大學，除左要黎吸晒大陸果D渣學生之外，就係要整古D老闆，因為D老闆根本唔知邊個畢業生先得！

不過，比多二億比大學，唔夠！

我打算，黎緊會大手興辦教育。

唔止九年免費教育，仲有，大學全部免費，所有人都可以免費讀大學，會開辦以下課程：
1. 教市民點用噴霧劑，呢樣要讀三個月；
2. 教小學生玩PSP！點解要教? 佢地唔識日本，教識佢地睇，咁先玩得叻！(因為好多雙失，咩都唔識，淨係識打PSP，只可以請佢地做呢樣，每人月薪二萬！)
3. 教亞嬸做祈福黨，等佢地可以知祈福黨點運作！如果佢地變左做祈福黨，咁，警隊咪會要求加人手，你知紀律部隊用幾多錢架啦！
4. 教發電廠環保D！呢樣肯定係教極都無用，保證長做長有！
5. 教全香港市民學普通話！北京胡同果種口音！香港人條脷有問題，都係保證做極都做唔到！
6. 買起係電台度嘈喧巴閉果個「才子」，佢話我好叫人「居安思危」，我要佢收爹！
7. 教公文袋會員經濟101，等佢地知道咩叫供求！
8. 教白鴿黨既人認識亞爺個黨，即係亞爺講果套，唔係佢地果套，即係六四係「春夏之交的小風波」，唔係佢地講果套！
9. 係邊境成立一個新中心，比我地食落肚D野，無毒先准入；大肚婆如果個肚無毒，就唔准入；
10. 不過，點都唔夠呢招黎：教亞董重新上位，鼓勵佢再推行八萬五(係該要UPGRADE到20,4700)，咁肯定唔止四百億，四萬億都會幫我蒸發，唔止唔駛減稅，仲可以要求加GST！咁，我就唔駛減稅啦！

你話我係咪好好橋呢?

減稅！好.....................難囉！

唉！點算呢? D錢多到咁........我點可以收埋D錢呢?

肥馬臨放假前話比我知，今年分分鐘四百億盈餘，嚇到我魂魄都唔齊.......四百億！點駛? 呢個咁既死肥馬，仲敢去放假，仲唔同我諗條橋收埋D錢。

不如......叫D人唔駛交稅住呀，咁，D稅咪唔駛入賬囉！唔得，咁，D人實知我特登做低條數......而家班垃圾會議員，好似無以前咁垃圾......比佢地知道就唔得掂！

本來，我都有諗過，唔收印花稅，而家個市咁顛，淨係D印花稅，已經超標一百億！咁做低印花稅，我盤數就無咁顛！但係而家D印花稅幾乎係自動波，我叫佢地唔交，唔單止而立法，比班垃圾會議員知道，仲要改晒D電腦系統！又攪唔掂！

仲有既......叫任蠢材蝕咁D，但係，果度都蝕唔到幾多，蝕晒，都係二百億，即係賺少二百億，都仲有三百億........！都唔得......

加公務員人工? 實比鼓油黨媽到我反艇......有咩辦法呢? 呀！諗到！

我加班局長人工咪得囉！
拿，林D9成功抗拒民主進程，加DOUBLE！
肥馬，唔，我要買起佢，都TRIPLE，仲要請埋佢老婆！
周圍嶽，佢都好辛苦，加DOUBLE！
煲煲！減人工！佢都有長糧咯！
章章！同我爭?減一半人工！

咁，就駛多一千萬！......但係，駛多一千萬......，都有排用唔晒！

呀，我諗到！津貼全港老細同打工仔強積金一年！不過，有條件，.....下次先話比你知！
哈哈哈，我一公佈，我睇下煲煲敢唔敢做低我.......！CS又無得做咯，鬍鬚仔咁後生，都可以做CS，我連一D權都無，咁算點先?

成功爭取取消銷售稅！

我知果D死人政黨一定會咁寫，一定會掛到一街都係膠banner，驚死我唔知我自已取消左gst咁！

我知我知，你地都好鬼開心丫麻。
我知我知，你地都話，一早就話比我聽唔得丫麻。

你估我唔知咩。你賴我都無用架，你到左今日，都仲攪唔清楚，到底點解我要推gst? 後知後覺D喎，成壇野，其實係煲煲自己攪大左個頭，科網爆果陣，整左個咩稅基狹窄諮詢委員會...，咁果時講到好有問題，香港隨時會破產咁，佢又驚，如果選果陣比人問，唔知點答，又唔想下屆攪D咁野，咪迫我一定要做囉，攪到我咁"law"，等我無得做CS丫麻，賤精！你睇下佢今日丫，仲出黎講話「務實」，咁即係咩意思先，即係話我個人好高騖遠、唔踏實、好做唔做咁話啦，係度扮晒英國人綿裡針.............!!

我知我知，你地實話我自打咀吧啦！
我知我知，早幾日，我先係垃圾會鬧完D政黨不負責任。

但你又知唔知，份稿邊個寫架? 唔係我個PA.....係煲煲個SPIN DOCTOR，佢迫我讀佢篇稿....!!!唉，真係，啞子吃黃蓮呀！

你估我想架！我真係唔想架，開左GST，到時邊個買我果D靈芝喎！

唉，我今朝出門口，已經搽左好多面懵膏，都唔係好菸o者......我諗，D市民都會明，我係比亞煲煲迫架O者......我已經講左好多連自己都唔信既原因，去解釋點解要開GST架啦喎......係咪，都好obvious呀? 會唔會令班商家(即係小圈子果班)以為我智商有問題丫? 應該唔會卦！

其實係亞娘教我架，佢話，政治既signal，越唔想推，就要推得越勁，攪到D人都諗唔明點解我要咁，就會識掉轉黎諗喎.....我自問，都做得好出色架啦................咁....果班嘈喧巴閉既政黨......咪即係......

不過，講你知丫，我真係好頂唔順班假髮黨。

如果你有睇晒今日D新聞，你都知，果D豉油黨、白鴿黨同林善聯，已經碌出黎領功啦......咁我都唔怪佢地，咁佢地真係反得好犀利....好過煲煲，出黎領功，係領人地果D功.....BTW，我想講既，湯湯居然話失望，佢話我無決心擴闊稅基......我真係....覺得，沙灘上面個太陽囉！

拿，即係咁，你反對唔緊要，我咪同你玩囉！

但係，假髮黨又唔夠膽支持GST，當花旗森係垃圾會動議反GST果陣，佢地支持個MOTION，但係，而家又出黎媽我，又話律師要好有邏輯既? 係邊呀? 佢地黎同我講BUDGET果陣丫，明明話支持GST同反對減薪俸稅嫁，早幾日，湯湯又跳出黎，鬧我低估盈餘丫！喂，點玩呀? 再係咁，我唔同佢玩..................!

唉，你地唔明架啦，見我果D人，見人講人話，見鬼講鬼話，野野都跣我......條腰真係唔襟撻......！唉......

WELL,我要休息一排呀，要開始寫BUDGET啦！出年一月，再同你地嗲過啦，(下次梗係嗲BUDGET啦)！多謝所有留過COMMENT，同埋係個BLOG，或者係唔同FORUM留過言、推介過個BLOG既朋友，尤其有位叫city2047或類似名稱的朋友，我知你在很多FORUM留過言叫人睇，多謝！

豬兜度度有，政府特別多

我都唔明下面班人做緊乜！

我星期一先上電台，豬炳都聽得出我唔會減稅啦，好心肥馬管下班馬仔啦！尋日出個press，話應該可以做到56億surplus，大佬呀，駛唔駛咁早碌出來同d政黨做勢呀? 等果d反對黨──即係反對我做既野果d......跳晒出黎叫我減稅，唉，我想截都截唔住！

我撥個輪去肥馬度，呢隻野居然仲敢駁我咀！

糖：你個腦生係屎忽度呀......
肥：(細細聲)大家咁話啦！
糖：.....我岩岩先媽完果班人，叫我減稅要「回復02/03年係貪方便」，你今日set好支q比佢地上，你同佢地有路呀....
肥：你咁講，即係話埋我風塵三俠黨個老死o者，佢果時咪又係咁...同埋，凡事都有兩面既，拿，我地咁樣一早講定，班白鴿仔咪無得話你做數囉......咁都幾好呀，佢地咪最多話你係守財奴......
糖：你搏炒呀，再嘈，公廁都有得你守呀！
肥：咁我以為上年我衰左，今年唔想比蕉皮你踩o者，咁又唔岩......
糖：你......

咔.........

死肥馬，都唔知，係咪為左下年仲有得做，過左去煲煲個馬房......我明明成個plan，就係要講到好無可能咁，然後到最後先宣佈架麻，而家攪到我做咩都係因為d討厭既政黨出聲話要，我先回應，攪到我好似亞董咁慢三拍......到時又比佢地班人第183次成功爭取......都唔係路，要諗下計先得！

煲煲之英明神武

你尋日有無睇西報呀? 我睇完，真係笑到死咁濟.....星期一煲煲去簽個咩咩約章，同班鬼同空氣污染，西報果張相，係佢對住兩個鬼佬 講野，講到好鬼興奮咁......兩個鬼，個木廿土水 樣扮到好appreciate咁..........講多無謂，去片啦！

拿，你睇下上面果張，我地亞煲煲幾咁英明神武！當然啦，呢張，係官方相丫麻，唔影好D，點用黎選舉喎！

不過，睇下下面果張，就係西報相，係咪好似殖民地時代，港督去巡學校，由學生會會長戰戰兢兢介紹學校俾港督睇呢！



所以呢，人生得矮，就真係差咁d......！據說尋日呀，佢睇到呢張相，話以後唔比料西報呀，小器得佢丫！

唉，我真係要多謝亞娘，生得我手長腳長身又長，企出黎都精神d啦！返去真要鍚番亞娘一啖！

不過，醫生都係好高大威猛喎.......無著數添！

無左半條人命

唉，終於上番水面啦......可以唞啖氣啦....！唉，你知啦，搏札....就係辛苦d架啦，我都明架啦......。

呢排，我實情做左一棵聖誕樹.....你知啦，聖誕樹，無手，點寫blog先得格.....

而家浮返上水面，咪可以去電台講下野囉！

唉，其實我呢輪，係見緊班政黨、商會、漁農界代表......同埋亞爺，問佢地想我派咩聖誕禮物....你知啦，佢地個個都以為自已好另好重要，實情係連政府收幾多稅都無知，叫我做果d野呀，如果我真係做呀，莫講話收gst丫，用埋亞爺果筆棺材本都無夠！拿拿拿，我根住就會見班經濟學者，佢都多數都唔讚成政府用咁多錢，咁就好啦，我就大把藉口推佢地掛上黎果d禮物啦！

咪住，唔好咁快就話我唔聽意見先得格！你都唔知佢地叫我做d咩。減稅就梗係有啦，仲有叫我比二百億d窮人呀......!使去邊先? 最好都係假髮黨，你知唔知呀，佢地話唔好減稅、仲話唔會反對開gst添呀，真係合晒我何車......不過我串亞湯湯，「咁你地又支持花旗森個motion? 貓哭老鼠....拿，睇個樣，我就收唔成gst架啦，你地果d咩要求，well，你可以返去等電話啦，如果一星期收唔到電話，你可以當你地已經落選......」佢地呀，即刻連面色都變埋呀，「糖糖，你知啦，我地後年就要選，三個黨都反對，你個方案又咁難sale，真係有d困難喎,,,,」湯湯，真係好似死魚咁呀......都唔知幾好玩......邊個叫佢地咁無義氣呀！

仲有，肥馬報告呀，雞議會突襲成功呀！我叫亞眼科醫生，交個名單黎，叫d針提個温和既動議，話稅基窄，果班白鴿黨既雞議員，即刻亂晒陣腳，投票投到亂晒籠......哈哈，你班人，以你地既力量同我鬥?簡直係蚊脾同牛脾！

gst呀gst，我真係好愛你呀......你帶給我歡樂......帶給我興奮，仲帶給我榮耀添呀，真係一次過滿足晒三個願望呀！

btw, 新加坡李資政玩野，居然加銷售稅，加到7%！唔通煲煲暗地同佢果邊結盟，想攪到我收唔到gst? well......

象牙塔即係象牙塔！

呢個咁既樹熊系主任......識少少，扮代表！話我無改革稅制.........我就黎反駁佢，以正視聽，重有，為左下一代著想......以後，邊個再敢批評我.....我就炒左佢！

第一，政府既財政嚴重不穩。個問題唔係過去會駛幾多，係以後會駛幾多......我唔想話我自己岩，但係都唔想話你錯......但係我唔講得咁多比你知。你佑啦，西九唔拍賣，東九都唔會，咁無地賣，錢從何來先得格......我重要起埋成條港豬澳大橋，成五百幾六百億！重有煲煲一年到黑做呢樣做果樣，今年淨係份 C 政報告，已經駛左成百億...！本來，我真係以後跟住幾年會有錢剩，但咁睇法，我真係好悲觀！呢d，你有無計過? 仲有，煲煲選到之後，仲要報答果八百個選民呢，一人一億，都八百億啦！我一年收得二千億架咋！

第二，人口老化就一定架啦！我都就黎退休啦！增加薪俸稅即係加稅！加稅好難過到垃圾會！我收gst，係想擴闊稅基，唔係想加稅..................不過唔多覺意收多左稅，梗係唔會比番你地啦！............間舖頭找多左錢比你，你都唔會比番佢啦係咪先！

第三，imf話香港稅基窄就係稅基窄，你咁叻，又唔見你去imf做，然後話香港稅基好寬，等我唔駛做丫咪！你都唔明，香港稅基有幾窄，人地，d人用膠袋要比稅，請人要比稅，炒人要比稅，買野當然要比稅，儲錢都要比稅、行路要比稅，呼吸都要比稅......我而家，淨係買野先比稅，有咩問題喎！再嘈，我要示威都要交稅，等你地咁鍾意示威丫?！

第四，銷售稅梗係公平啦！窮人要自己比，有錢人開公司，就可以係公司比，因為佢地買車、買名牌，全部都係公司比錢！我既原則，係無論有無眼耳口鼻，只要有心跳都要比稅，費事等陣，d人話我淨係減紅酒稅，為左自己！

第五，無論成本幾高我都要收！我夠知收稅，就要搵人去check下d舖頭有無淨係收現金、有無叫人去中英街提貨、有無叫朋友由深圳將間屋化整為零帶番黎，同埋有無d退左休既法官，去話自己收入低，然後拿津貼，同埋，果d麥記、x心、大家落，走黎要求佢地少稅d，因為佢地話，佢地要煲水果d煤氣要比稅，但係比水人飲唔收錢！(我一定唔會退比佢！d煤氣用黎煮野，唔係煲水，佢要打官司，我一定奉陪到底！駛錢，有咩緊要，我錢多的是，都係政府比之麻！加重政府成本? 你比o者，又唔係我！)

第六，香港稅制失去競爭力，唔係因為高過其他地方，失去競爭力既原因，係因為收得唔夠多錢比我駛！你真係，要人畫公仔畫出腸！你係咪做人做左幾十年架！

第七、我唔係無研究過，我研究過晒啦，淨係得gst行得通，你唔信，你咁另，咁你提d辦法黎聽下啦！

象牙塔即係象牙塔！

唉，我仲係咪做好呢?

睇黎我都係唔得架啦！

呢幾日，我靜靜地咩都無做，當自己係一個普通人咁，重新睇番，究竟我要點做，先可以攪到gst。我真係唔係幾信做唔到......又話香港人好專業，我用果d，全部都係專業資料黎固喎，點解咁多人鬧我呢?

......其實，我未有結論，不過，我隱隱覺得....自己好無用，收個稅都收唔到......仲要，四十票反對......我覺得，越黎越唔適合做政治，可能適合做爹地多d.....

點解咁講，你諗下，我點夠佢個班垃圾會議員咁好戲先得架！本來我都唔知，我一路都覺得，佢地只係驚支持收稅會失票，但係越睇越唔妥......果日，工會女同志好戲到......扮喊......我點識先得格......

講真，今次呢單最低工資，擺明就係煲煲同工會扯貓尾啦，工會攪到懶係大單，又通宵，又話告，又話唔支持；跟住，煲煲同勞工處打個招呼，咩都攪掂！煲煲咁高招，攪掂工會，仲要埋女同志第一次...流馬尿，到達煲煲重比左幾多好處比佢地呢? 唔通，出年煲煲選到之後，會放水比佢地，等佢地後年垃圾會重選會有著數?

唉，我係咪諗得太多呢? 因為，我諗唔到煲煲咁樣有咩著數，佢實會比工會夾住固喎......合唔合邏輯呢? 定係其實係我自己鑽牛角尖呢?

唉，我都唔明，我都做左咁多年生意，點解都唔夠煲煲呢個咁既公務員黎呢? 咁，出年係咪都係唔好做呢?

一身鬆晒，以後都唔駛做

好野，一了百了。好呀，以後咩都唔駛好咯！你知啦，我淨係管盤數之麻，咁而家垃圾會班垃圾....議員反對開 gst丫麻， 我都無錢用，仲有咩好做o者，果d每年的預算accounting，咪叫肥馬做左佢囉！

雖然，跟住落去其實我仲有d論壇，不過我真係唔駛比面......星期二日月報攪果個，我就一定係話無錢無得減稅！我叫肥馬星期一去假髮黨果個論壇，一定要串湯湯，都反對左咯，你地都已經有立場咯，仲攪埋d咩論壇做咩o者，學煲煲咁貓哭老鼠！

我下個月就開始見d人講budget，到時見所有人，除非佢地唔要求政府駛錢，否則，我一定叫佢地比左條橋我開新稅，如果唔係，錢從何來呀?

果班咁既低水平垃圾，係度講埋d亞媽係女人既野，我都知唔收稅最好，但錢從何來?

收入中立? 講下唔比咩，如果真係收入中立，我做咩要做咁多野喎。

不過，果日我叫肥馬係垃圾會聽足全場，佢話好彩放左兩粒air wave係對眼度，如果唔係，咁悶，一早就釣魚喎。

不過唔緊要，正如baby話齋，我仲有一個好強大既後盾，就係imf啦！佢地好支持我開稅！勾結外國勢力? 係又點丫? 最緊要做得到o者........約左誠哥打波.......梗係啦，收錢又唔得，駛錢又唔得，唔打波有咩好做喎?

沒有gst之後......

呢 D 傳媒都係衰架啦，仲唔係傳媒政客大合奏！D咁既報紙，仲唔係夾埋果幾個政黨，同今日個動議做勢? 你講話無，我都唔信呀。

果幾份呀，係啦，係果幾份啦！

唉，今日成日，咪就係為左聽日份SPEECH改黎改去囉。其實，我都唔明點解唔比我講真心話，如果可以................

* * *

各位議員：

老實同你地講，其實今日你地講果d野，我全部都同意，除左Baby同支持gst果班講果d之外，因為，我都唔想收gst......。講你都唔信，我一路做咁多野，都係為左今日，等我有機會同你地真情剖白。

我唔想收gst，唔係我唔鍾意錢，係收得太麻煩，同埋唔夠累退，所以，反正你地都唔同意開gst，我決定收回！

不過，你唔好拍手掌住呀！高達，你反應咪咁快好唔好，唔使咁快諗住打電話叫職員做banner領功！

大家既然覺得收gst咁煩，我打算改為收人頭稅！人頭稅既好處好多：第一，簡單，有頭就要比稅，如果有兩個頭既，比雙份，無得豁免！第二，簡單，每年自動過戶，稅單都唔係比！第三，簡單，我要加稅，只要同十間八間銀行講聲就攪掂。第四，簡單，我計盤數好容易，唔會有好大誤差。第五，簡單，唔會有人逃到稅，簡單黎講，呢種稅既發明者真係三頭六臂五簡單！

至於gst的好處，你地可以繼續討論，我要返去寫定下年盤數，預測下有幾個人死......即係我出年有幾多錢使................丫，係，收幾錢? 每人每年$29,000，咁我可以取消晒所有其他稅！

即係咁，如果你果d咩白鴿黨，咩林善聯而家回心轉意既話，都重要睇下大爺有無心情同你傾！你諗掂，就打黎M字搵我啦！

* * *
等佢班友仔，反對我個寶貝gst丫啦！

咩叫教育? 咩叫交通? 咩叫醫療?

拿，果班咁既垃圾會議員，唔好再話咩咩咩無得豁免呀，我比左架啦，咁又無?十四億啦......點計出黎? 我話十四億，咪就係十四億喎，你聽我講咪就得囉。

其實一日最衰都係果個死肥馬，我雖然批准你去媽果班垃圾o者，但係無叫你媽到佢起晒火丫麻，攪到我，要將原本出年財政預算先拿出來的條件咁早講，要再諗下下次有咩派，佢真係.......偷雞唔到......。

你仲未知我講咩呀? 我諗住豁免教育、醫療同交通費抽稅呀....都叫你睇報紙咯......

唉，你都唔知，做呢個位，真係辛苦到死呀。煲煲個位就好做好多囉.....唔想做果d又可以比人做！你都唔知呀，我今日，對住果班咁既報紙編輯，個個....(其實唔係個個既，得三份係黎真架o者，兩份中文，一份英文......其他果d....佢夠膽，咪試下囉，唔比獨家佢囉......)係度左問右問......，猛咁問十四億點計出黎喎............我點話你知先得格，因為肥馬同我講，顧問公司個顧問話，就咁計就十四億，但係你知啦，咩叫教育先...咩叫醫療先.....咩叫交通先。

拿，好簡單，第日所有買鞋都要豁免埋，11號巴士...都係公共交通工具......
咁買襪又要豁免啦，唔著襪，點著鞋呢?
電話費都要豁免，無人話transportation of voice唔係transportation既一部份......

ok，咁買牙刷、牙膏、牙線............都係基層醫療服務一部份，d市民會話.....
買頭痛藥、靈芝、燕窩(亞娘一定要....)、人參......有保健作用，又係醫療一部份......
仲有，到時，全人類唔去私家醫院睇醫生，去晒公家度睇.......個餅又大左....

至於教育喎.........約人去食飯，係因為要學野囉......佢教學打golf.....
打電話上網問功課，咁點可以唔豁免架.....
返學要著衫先返到......，唔係返唔到，所以，衣服、教科書、文具、書包，仲有亞媽果d衫呀，手袋呀、介指呀，全部要免稅，因為亞媽帶小朋友返學，要帶手袋同珠寶出街。

果d咩i卜，都要免稅，因為小朋友要上網download果d podcast，如果唔係讀唔到書.....！

呢，上面果d，全部都會逐步逐步慢慢扣.......我話收少十四億，係第一年咋。到第五年，如果仲係收5%，應該剩下30億！

咁無得收?咁咪加多d囉，40%！實現香港成為全球稅率最高的地方...........！我諗過既，你仲駛諗咩.........

都唔過咁點? 都話收工咯，點做o者！

大勢已去......但係我咁聰明，又諗到新橋啦~~~~~~~

唉，雖然煲煲搵露三點修訂星期三花旗森個gst motion，但係睇黎大勢已去，垃圾會都話反對，就真係做黎都徙氣......我唔係怕左佢地班人嘈喧巴閉，個問題係，如果我要收稅，唔係話我係財政預算度講兩句就可以架麻，要寫條法例，果班垃圾會議員通過先得架..................都唔明點解d英國豬咁蠢，有咩理由定d咁既制度，縛手縛腳，簡真係同自己作對......。

而家只係睇下點收科，幾時同點樣宣佈收工.....我太無毅力? 我又唔係洗毅力，點會有毅力喎！如果你咁諗，你真係唔理性啦，我有得做先得格！

你教我點做丫，我比我個位你做啦......咁煲煲做亞頭都咁縮骨，係份 C 政報告一隻字都無！個個官都彈開九呎遠，好似我生天花咁，我都真係同情掃把頭當年都真係慘。我最初，其實以為有得諗，你知啦，林善聯咁憎煲煲，佢地其實想幫我同煲煲跑過，但係摸到亞爺個底，知道亞爺想穩定d唔想變得咁多，就已經唔使諗，最慘就係果排白鴿仔猛咁示威簽名，攪到佢地下面d o靚嘈喧巴閉...，單眼曾話，果d屋村師奶好鬼反對，班衰議員出年要選舉，比白鴿仔做晒佢地會好大鑊咁話喎......就係咁，連最同情我既林善聯都拉埋橫額！

本來，假髮案亞湯湯見我個名同佢咁似，都好支持。你知啦，佢好鍾意政府收稅嫁麻，以為收到稅我就會攪社會福利.........但係，其他幾個假髮人襟住佢，唔想個黨分裂，因為社福長毛實反?，同埋，另外果幾個假髮人，根本就好唔妥佢咁鍾意出位，成日d野都未傾過，或者未傾掂，就賣賬比記者搏出位，攪到無晒黨紀............佢而家都唔敢出聲，同埋，你知啦，佢地幾時有支持過政府先得格? 所以，都係唔使諗......因為，我已經係報紙度見到佢地話會支持花旗森啦！

鼓油黨本來有d機，話晒都係老友，如果係佢地入到，我真係可以同佢地傾下，改得好d，唔好無彎轉，但佢地又唔爭氣......！

唔通叫白鴿仔反對自己個motion咩? 唔好玩啦，你當我白痴架?

我都話左無計啦......................一係，組織班公務員去現場支持我又得唔得呢? 既然甜甜佢地可以叫d鋪頭d staff去遊行當返工，我點解唔可以喎?

除非......，叫董董出黎....??唔得唔得，我都無好日子過....

又或者......邊個立法會議員支持，就可以分配到1000張出年車仔黎香港既飛.........不過，佢地唔係衰議員，1000張飛，比衰議員就夠佢買票，垃圾會議員個區咁大，唔夠派喎....

唔通，丫咁實得！支持果個垃圾會議員，佢果區市民免交薪俸稅五年！咁佢d選民，咪會迫佢支持gst囉！丫，係喎，咁咪淨係得港島果d支持囉? 九龍同新界d人咁窮，都唔使交稅.....

又或者....支持我既可以見亞爺，提一個願望....................但係，如果班白鴿仔叫亞爺普選咁點算? 如果叫香港，可能都仲好d，等陣，爆缸仁仁話要大陸有民主，或者平反六四，我咪死梗......！都係唔得......

CEPA? 佢地都唔做生意......

見美國總統? 布殊無咩吸引力喎......克仔好d喎，但佢又唔係總統...！

綑綁！係啦，係綑綁啦！唔支持gst，就唔比錢做教育同環保......，得喎，又可以做低煲煲，又可以做低白鴿仔同鼓油黨......等我做低出年盤數，攪到有赤字先......到時，我就同佢地講數，拿......你見啦，無錢呀，無得做啦.............，仲可以做低埋煲煲，等佢用我d錢黎選舉用得咁爽丫拿。你見啦，佢地一早已經碌左出去領功，果d咩成功爭取橫額，已經掛到一街都係......好，聽日撥個輪比肥馬，叫佢好似今年咁，做低盤數先！

唉，學泰國啦，叫亞爺授權比我，拉晒佢地去秦城！咁就乜都攪掂晒，唔駛咁煩！

居然係白鴿仔幫我出左啖氣！

我雖然唔鍾意白鴿黨，因為佢地今年成年好似上左身咁，猛咁鬧我造數......咁我盤數梗係要做啦，唔通可以變出黎咩.......其實我只不過計錯左數，計少左一百億之麻，使乜咁緊張喎，但係佢地偕偕就不停咁話我造數...........其實呢劑又係肥馬害我....都唔知以前點做銀行，成日都計錯數！

不過呢，今日我幾乎想攬住佢地錫咁濟！

今日，白鴿黨橡筋褲第一個問問題！咁正常人都會覺得，佢一定係問最低工資，果然......不過，佢居然係GST喎！

佢串亞煲煲，份 C 政報告 個所謂主題.....以民為本咁話.....但係七成人反對銷售稅，叫佢收番咁話喎！

嘩，我直情成個人醒晒......第一，我要打醒十二分精神，睇下佢有無再比蕉皮我踩。第二，我要睇下佢識唔識答......！

我睇住佢，第一句講出口既，居然係「其實鄭議員是有兩個問題，一個講銷售稅，一個講為何不落實最低工資政策。」然後，佢話「銷售稅不是一個新議題，提出銷售稅的原因，我已在很多場合解釋過，這個問題我們已研究了差不多六年......」

好明顯，佢根本完全無預備要講GST，所以，佢完全忘記左GST果D野，要遊完一輪花園，先至開始講番咩稅基窄................

跟住，佢講講講，講左一輪最低工資......跟住橡筋褲居然仲追問GST...

佢個SPIN DOCTOR明顯叫佢唔好再講GST，所以，佢無講過咩野，但係，如果我係市民，我點會唔覺得，佢左閃右避.....好似今日份西報咁，佢駛錢，我就揹左個GST...

雖然做唔低佢，但係，WHATEVER，總之呢劑係UNEXPECTED既，就點都令我開心左一個下晝，突然間覺得，白鴿黨有時都STUBBORN得有D可愛。

你話煲煲幾絕丫！

成份 C 政報告，一隻gst都唔，莫講話撐丫，直頭同亞董「唔講就不存在」有得揮呀。仲有，連扶貧都唔講。總之係我做既野佢就唔講！

你話佢幾咁絕丫。唉，有時我都諗下，真係你選飽佢啦！雖然，做到一區之君，點都係光宗耀祖，但係，為咩先得格? 煲煲而家直情全情投入選緊舉！個網站攪到懶係專業咁，咁都算啦，但係，喂，使唔使咁小器呀? 攪到我好似無做野咁，唔通你唔提我，我就不存在咩！咁掉番轉，我讀筆直果陣，係咪又唔提佢做果d野，當佢不存在先? 唉，真係幼稚到......我終於知道咩叫返老還童，佢都六十幾啦，就黎拿到生果金囉，仲咁小朋友......我d仔女，讀小學已經唔會話「我唔同你玩」呢d咁野啦！

你地而家清楚啦，亞高達係報紙度話佢，無錯架(雖然我好少認同佢講野)，佢根本就係快閃黨，不過，仲係快閃黨同攝石黨混合體！好野就係攝石黨，唔好就快閃......

所以，都係唔駛旨意佢啦！玩完今個禮拜，下個星期就輪到我！講真，去我就唔想佢架啦，不過，煲煲叫左個行歪議員修訂花旗森個議案，咁無理由我自己唔蒲頭架！同埋，我又真係好驚肥馬講錯野，你見佢肥到咁，就知啦，佢個人諗野唔識轉彎，生吞活剝，呢幾日報紙話中年發福果d，記憶力都差d架！呢幾日，仲要捉林善聯班友係捽下先，大佬，無佢地支持，等陣真係比佢地過到就好煩，班白鴿仲唔嘈到拆天咩......都係煩嫁啦，好衰唔衰比佢地抽到！叫亞湯湯幫手遊說下果幾件假髮人先，佢地無個識經濟，好容易講，又鬧煲煲唔要積極筆杆魚、又話要政府做福利、但又話支持銷售稅；話要幫中產、又唔比減稅，都唔知想點，所以，反而好易講......好，睇日約佢食早餐先！

C 政報告GST部份優先睇

唔，聽日份 C 政報告，大家都已經係報紙度睇到啦！不過GST既段落唔長，因為煲煲始終想將條蕉皮留番比我.......不過，如果真係寫，係該點寫呢? 唔，拿，政府就梗係用D好似幾有道理既語言同你講啦，但其實，講白D既話，就會係咁：

---------------------------------------
呢排成日都有人，問我點解要開GST，其實，成壇野都唔關我事，係糖糖話要開......至於報紙話我比蕉皮佢踩，我只可以話係佢既苦肉計成功。點解佢要開? 我唔可以代表佢立場，但係，簡單黎講，做盤數容易D囉！

當然，話就話唔關我事，但我都有著數架！而家就話比你知。第一，我可以攪掂果班明星仔！佢地一無工開就好麻煩，成日叫D大佬黎煩我。

第二，等我可以派多幾個餅仔。呢樣我要詳細解釋一下。你知啦，我有八百個選民架麻......我話晒都係亞爺D o靚選我架麻，我點都唔可以唔派番D獎比佢地呢。但係，我又唔可以個個都派大紙經.....咁呢，我就必須要整多D餅仔。

咁我又唔係耶穌，唔識得五餅二魚丫麻......於是，我咪要整多幾個諮詢委員會囉.........拿，我地而家有狗隻及貓隻分類委員會，咁我要加多幾個雞隻及鴨隻分類委員會、豬隻及牛隻分類委員會、貝貝及蜥蝪分類委員會.....，以示公平。我地而家有氣體安全諮詢委員會，我要加埋固體安全委員會、液體安全委員會。而家我地有香港會計師公會調查小組A，加埋B, C, D.......Z。有海魚獎學基金顧問委員會，係咪要有埋海蝦、蟹獎學基金顧問委員會、海馬、海象、海狗、海獅、海草、海螺、海鹽、海水.......獎學金委員會......。

既然有橋樑及有關建築物外觀諮詢委員會，使唔使有埋行政長官外觀諮詢委員會。有高速船諮詢委員會，使唔使有低速船諮詢委員會......！

你知啦，叫佢地開會要打電話，要打咁多電話，請好多人先得架......要請人喎......D錢係邊度黎喎，樹生出黎咩，GST囉！！！

第三，當然，有左GST之後，「擴闊稅基」！於是政府咪唔駛靠賣地囉！唔駛靠賣地，我咪可以整多幾個西九龍、數碼港......囉！咁樣，誠哥一定會讚我乖仔o者！仲有，我唔做之後，仲可以有個幾百薪年薪既乾收銀(即係consultant呀)位添呀！
---------------------------------------------------

呢D.......係我截聽返黎架，估唔到呢！