各位有看過糖糖網誌的網友：
多謝你地一直支持，我絕無估到，最近仲有人問我去左邊......。當初開始寫這個網誌的時候，也沒有想過吸引到幾份報章報導，只是想從一個小市民的角度，去理解為什麼政府大把盈餘，還要開徵銷售稅咁不可思議！
我本人對糖糖無咩惡意，並不討厭他，只是「適逢其會」佢剛剛做財爺，才找他做主角咁解。現在看來，銷售稅似乎在三五年內也無得翻身......對香港是好事。這更令我覺得，香港人一定要努力走出來講自己要咩同埋唔要咩。政府係一個好怕事的政府，凡事唔駛講道理，佢而家，已經唔會聽道理，係聽夠唔夠大聲，邊個夠大聲，邊個話事！
最近，個市都係度講緊普選，果班好討厭的假左仔，又跳出黎話2012又無普選......我相信，再過多五年，佢地一定都係話2017, 2022, 2027......都唔可以有普選，令人極為厭惡。如果我地唔出聲，我相信到我地個孫個代，都唔會有普選。
舊年開始寫糖糖網誌時，其實相信辛苦，因為我日間要返工，很多時回家已經差不多半夜，才開始想有什麼可以寫，有靈感都要寫到一、兩點......，無靈感就更得寫得唔好，但有咁多人睇同回應，我已經好滿足。我不會再更新這個網誌..................除非糖糖去選特首啦！可能會再set up第二個，講香港政治、政策 and whatever。
多謝各位，後會有期。
糖糖
關於我
- 糖糖網誌
- 呢個網誌，純係我亞糖糖記錄推GST半年的心路歷程，由於裡面涉及到好多政府的機密，所以，要按偉大的香港科幻小說始祖的教誨，將真名刪去並換上杜撰的名稱，更加要套一句俗話：如有雷同，實屬不幸。
仲有，你讀呢個網誌果陣，先要對中國歷史或香港時事有些少認識，同時，有追看報章政情版的八卦部份，才能掌握裡面內容的脈搏，尤其那些杜撰的名字。
至於睇唔明的讀者，如果是學生，你可以去信亞醫生部長，要求佢將呢個BLOG加入通識科會考的考試範圍，各大補習學校便會將文字翻譯至你們看得懂(包括ICQ及MSN半中不英)的版本，並有靚仔靚女MISSY亞SIR真人話劇演釋。至於其他看不明白的人士，抱歉，因為亞CE雖然去新加坡取經，但並沒有將大政府(同肉骨茶)取回香港，所以我唔會教你飲可樂會變肥仔......。根據表面上小政府的原則，我們會鼓勵你自力更生。